Bota e ndihmës së huaj është pak a shumë si ajo e Lojërave Olimpike: vendeve iu pëlqen të konkurrojnë për të treguar ngjyrat e tyre kombëtare në sa më shumë fusha që të jetë e mundur. Mes 41 vendeve donatore që kanë mundësuar të dhënat për ndihmën e huaj, Japonia kryeson garën, pasi ka dërguar ndihmë për zhvillim në 141 vende dhe territore. Amerika, e cila ka dhënë më shumë para se gjithkush tjetër, vjen e dyta me 132 shtete përfituese.
Buxhetet e vogla nuk janë një pengesë për vendet që të japin donacione. Luksemburgu i vogël u ka dhënë ndihmë 74 vendeve, duke ndarë mes tyre më pak para sesa Amerika i ka dhënë e vetme Burkina Fasos. Përfituesit më “popullorë”, ndërkohë janë Afganistani, Kina, territoret palestineze dhe Uganda, të paktën deri 2 vjet më parë, kur shtetet mundësuan publikimin e të dhënave. Secila prej këtyre vendeve ka marrë ndihma prej 35 shteteve.
Ndoshta, mund të duket e habitshme, që shumë përfitues nga ndihmat edhe vetë arrijnë të japin një dorë ndaj shteteve të tjera, zakonisht në stilin alla-Luksemburg, me buxhete modeste. Në vitin 2014, Turqia ndihmoi më shumë vendeve sesa Britania, Tajlanda ishte përpara Kanadasë në lidhje me vendet të cilave u dha donacione. Të dhënat për sasinë e ndihmave që shkojnë për vendet në zhvillim, sidoqoftë, mungojnë.
Brazili, India, Indonezia dhe Meksika – që secili ka marrë ndihmë nga më shumë se 20 vende – janë mes shumë shteteve marrëse që dërgojnë donacione jashtë territorit të tyre. Në këtë kategori Kina duket se kryeson vendet që shtrijnë dorën e tyre në më shumë vende, edhe pse marrin donacione nga të tjerë. Në vitet 2010-2012 ajo u dha ndihmë 121 vendeve të tjera.
Përgatiti: Juli Prifti – /tesheshi.com/
