Lionel Mesi është pa diskutim një nga simbolet e Argjentinës. Madje, një nga përfaqësuesit më popullorë të vendit në arenën ndërkombëtare. Ylli i Barcelonës është njëkohësisht edhe heroi I Santiago Lopez Menendez.
Inxhinieri 28- vjeçar, prej më shumë se një viti ndodhet në Nigeri, ku po punon për një kompani të huaj.
Gjithsesi, pak ditë më parë ai përjetoi eksperiencën më të frikshme të jetës. Ai u mor peng nga një grup personash në afërsi të qytetit Kontagora dhe u mbajt për tri ditë, deri kur kompania pagoi shifrën e parave që kërkonin keqbërësit. Por, nuk ishte vetëm shpërblimi ai që i shpëtoi jetën. Grupi i rrëmbyesve, në fillim kishte si synim për ta vrarë.
“Më morën peng dhe nisën të më rrihnin. Ata mendonin se isha amerikan dhe po më godisnin për të më vrarë. Nuk dinin anglisht dhe nuk dija se si t’ua shpjegoja që isha argjentinas. Vetëm kur fillova të bërtas ‘Mesi, Mesi, Mesi’ ata ndaluan. U mundova me shenja dhe me emrin e futbollistit që t’u shpjegoja se nuk isha amerikan, derisa i binda. Më pas, besoj vendosën për të kërkuar para për të më liruar”, tregon Santiago.
Vëllai i tij tregon:
“Ishim të gjithë shumë në merak. Sapo u rikthye në Argjentinë, më përqafoi fort dhe më tha: ‘Jetën ia kam borxh Lionel Mesit. Prej tij jam ende gjallë’. Në fillim mendova se ishte i rënduar psikologjikisht, deri kur më tregoi edhe historinë”. Sulmuesi i Kombëtares është një nga futbollistët më të dashur në botë. Aktualisht, ai po udhëheq ekipin përfaqë- sues në Kupën e Amerikës, ku në gjysmëfinale do përballen me Paraguain. /tesheshi.com/
