Shpërthen skandali rreth dyshimit se Kryeministri i Kosovës ka përdorur postin zyrtar që t’i japë të birit, Besnik Mustafës një kontratë qeveritare për të rregulluar makinat e shtetit.
Një denoncim i bërë sot, është hapur si vaji në lakra, duke përfshirë edhe kreun e Agjencisë Shtetërore kundër Korrupsionit.
Më vonë, edhe zyra e shtypit e Kryeministrit ka reaguar, duke thënë se djali i Kryeministrit ka paraqitur çmimin më të ulët! Një argument i dyshimtë që duket se nuk qëndron në këmbë, ndërkohë që publikut i duhet thënë e vërteta, se këtu kemi të bëjmë një konflikt interesi, por është thjeshtë një makinë dhe 3000 euro punë.
Nëse ky tender nuk do të ishte kryer, asgjë nga furtuna e ngritur nuk do të ekzistonte.
Ngjarja
Mediat e Kosovës kanë publikuar sot lajmin se një BMW 4×4 e blinduar që i është vënë në shërbim Zv.kryeministrit, Hashim Thaçi, është riparuar nga servisi që është në pronësi të djalit të Kryeministrit Musa Mustafa.
Kreu i Agjencisë Anti-Korrupsion, Hasan Preteni deklaroi se ka nisur hetimi për çështjen për të parë nëse ka një konflikt interesi.
Perteni deklaroi për Klan Kosova se një veprim i tillë nuk tregon situatë të mirë. “Në pamje të parë, nuk duket diçka e mirë. Ne kemi filluar punën dhe të shohim se çfarë përfundimesh do të nxjerrim”, tha ai.
Reagimi
Ka reaguar në mbrëmje zyra e Kryeministrit të Kosovës, e cila i ka ëuajtur lajmet mbi këtë çështje si jo korrekte. Në një prononcim të zyrës së prokurimit të qeverisë së Kosovës, theksohet se “kjo procedurë është kryer në përputhje të plotë në dispozitat dhe kriteret e përcaktuara me Ligjin e Prokurimit Publik, duke i kushtuar kujdes maksimal shpenzimit sa më racional të parasë publike dhe se në përzgjedhjen e fituesit nuk kishte asnjë motiv tjetër”.
Sipas komunikatës, djali i Kryeministrit e ka fituar tenderin se ka paraqitur një çmim më të ulët sesa dy konkurentët e tjerë.
Duke dhënë detajet, kjo zyre thekson se “Për dijeni të opinionit, dy operatorët e tjerë ekonomik konkurrues kishin ofertuar me çmimet 3,480 Euro, përkatësisht 3,207 Euro, ndërsa operatori Makcar (Besnik Mustafa) kishte ofertuar me çmimin 2,946 Euro dhe si rezultat ishte shpallur fitues”, thuhet në komunikatën e Zyrës së Kryeministrit.
Në fakt nuk është aq e thjeshtë. Si ka mundësi që zarfi me çmimin më të ulët të paraqitej nga i biri i kreut të qeverisë? Të jetë rastësi? Ndoshta, por në aspektin juridik dhe moral, ka më shumë se një pikëpyetje, të cilat natyrisht nuk zgjidhen me njoftime dykuptimore…/tesheshi.com/
