Magawa, një brejtës që zbuloi më shumë se 100 mina tokësore dhe eksplozivë në Kamboxhia falë shqisës së nuhatjes dhe fitoi një medalje për bëmat e tij, është shuar, tha organizata që e trajnoi atë.
Magawa, i cili “doli në pension” në qershor të vitit të kaluar, u shua gjatë fundjavës, sipas organizatës ndërkombëtare jofitimprurëse APOPO.
“Magawa ishte në gjendje të mirë shëndetësore dhe e kaloi javën e fundit duke luajtur me entuziazmin e zakonshëm, por në fund të javës ai filloi të ngadalësohej dhe të flinte më shumë se zakonisht, ndërkohë që tregoi më pak interes për ushqimin”, tha organizata në një deklaratë.
E prekur nga dekada të tëra të luftës civile, Kamboxhia është një nga vendet me më shumë mina në botë dhe më shumë se 1000 kilometra katrorë janë kontaminuar.
APOPO, një organizatë me bazë në Belgjikë, trajnon minjtë gjigantë afrikanë për të zbuluar minat tokësore dhe i quan ata “HeroRATs”.
Përdorimi i tyre zvogëlon rrezikun e viktimave njerëzore në çaktivizimin dhe pastrimin e minave.
Për shembull, tre kamboxhianë u vranë të hënën ndërsa përpiqeshin të pastronin minat pranë kufirit me Tajlandën.
Në vitin 2020, Magawa mori një medalje ari nga Dispanseria Popullore për Kafshët e Sëmura të Britanisë së Madhe, për “guximin me të cilin shpëtoi jetë dhe përkushtimin ndaj detyrës”.
Magawa vjen nga Tanzania dhe u transferua në Kamboxhia në vitin 2016. /tesheshi.com/
