Shkrimtari çek Milan Kundera vdiq në moshën 94-vjeçare, njoftoi televizioni kombëtar çek.
Kundera filloi të botonte që në vitin 1953. Ai shkroi në çekisht dhe frëngjisht.
Veprat e tij më të famshme janë romanet “Lehtësia e padurueshme e ekzistencës” dhe “Shakaja”.
Kundera ka fituar vlerësime të shumta për stilin e tij të përshkrimit të temave dhe personazheve që rrijnë pezull mes realitetit të zakonshëm të jetës së përditshme dhe botës sublime të ideve, shkruan Reuters.
Emigrimi në Francë
Ai lindi në 1929 në Brno, por emigroi në Francë në 1975 pasi u përjashtua për kritikat e pushtimit sovjetik të Çekosllovakisë në 1968.
Në Francë, ai botoi disa nga veprat më të famshme, duke përfshirë “Librin e të qeshurit dhe harresës”, “Artin e romanit” dhe “Pavdekësinë”. Veprat e tij të mëvonshme, të shkruara në frëngjisht, nuk u përkthyen në çekisht.
Kundera herë pas here vizitonte Republikën Çeke, por gjithmonë privatisht dhe kalimthi, si dhe nuk foli kurrë me shtypin.
Në vitin 2019, atij iu rikthye shtetësia çeke, 40 vjet pasi iu hoq shtetësia çekosllovake.
Për ngjashmëri, Kundera la atdheun e tij për Francën siç Kadareja në ‘90-ën. Por në stil e në fat qenë krejt ndryshe. Kundera ishte filozofik, Kadareja historik; Kundera kurrë konformist me sistemin, Kadareja dhe i tillë në një pjesë të jetës e krijimtarisë. /tesheshi.com/
