Mikhail Gorbachev, i cili i dha fund Luftës së Ftohtë pa gjakderdhje, por nuk arriti të parandalonte rënien e Bashkimit Sovjetik, vdiq të martën në moshën 92-vjeçare, njoftuan agjencitë ruse të lajmeve, duke cituar zyrtarë të spitalit.
Gorbachev, presidenti i fundit sovjetik, nënshkroi marrëveshje për reduktimin e armëve me Shtetet e Bashkuara dhe partneritete me fuqitë perëndimore për të hequr perden e hekurt që ka ndarë Evropën që nga Lufta e Dytë Botërore dhe ka çuar në ribashkimin e Gjermanisë, shkruan Reuters.
Mikhail Sergeyevich Gorbachev lindi më 2 mars 1931 në qytetin Privolnoye në Ukrainën e sotme.
Ai ishte lider politik i Bashkimit Sovjetik nga viti 1985 deri në 1991 dhe Sekretar i Përgjithshëm i Partisë Komuniste të Bashkimit Sovjetik.
Përpjekja e tij për reformë çoi në fundin e Luftës së Ftohtë, por gjithashtu çoi në fundin e pushtetit suprem politik të Partisë Komuniste të Bashkimit Sovjetik (CPSU) dhe në rënien e Bashkimit Sovjetik.
Ai u nderua me Çmimin Nobel për Paqen në vitin 1990.
Ideologjikisht, në fillim të karrierës së tij politike, Gorbaçovi ishte i prirur drejt marksizmit dhe leninizmit, por në fillim të viteve ’90 ai ishte kthyer në idenë e demokracisë sociale.
Sundimi i Mikhail Gorbachev u karakterizua nga termat “Perestrojka” dhe “Glasnost” (reforma dhe hapje).
Kur u bë sekretar i përgjithshëm i Partisë Komuniste Sovjetike në vitin 1985, në moshën 54-vjeçare, ai u përpoq të rigjallëronte sistemin duke futur liri të kufizuara politike dhe ekonomike, por reformat e tij dolën jashtë kontrollit.
Politika e tij e “Glasnost”-it – liria e fjalës – mundësoi kritika të paimagjinueshme më parë ndaj partisë dhe shtetit, por gjithashtu inkurajoi nacionalistët që filluan të bënin presion për pavarësi në republikat baltike të Letonisë, Lituanisë, Estonisë dhe gjetkë.
Shumë rusë nuk e kanë falur kurrë Gorbachev-in për turbulencat që shkaktuan reformat e tij, duke e parë rënien e mëvonshme të standardeve të jetesës si një çmim shumë të lartë për demokracinë.
Pasi vizitoi Gorbachev-in në spital më 30 qershor, ekonomisti liberal Ruslan Grinberg i tha gazetës së forcave të armatosura Zvezda: “Ai na dha të gjithë lirinë, por ne nuk dimë çfarë të bëjmë me të.”
Në vitin 1992, Gorbachev hapi një fond ndërkombëtar për studime socio-ekonomike dhe politike të njohur si Fondacioni Gorbachev, më pas Kryqi i Gjelbër Ndërkombëtar dhe u bë anëtar i Klubit të Romës. /tesheshi.com/
