Dy seancat e veçanta hetuese të parapara të mbahen këtë javë janë shtyrë nga EULEX-i. Lajmin për shtyrjen e seancave e konfirmoi avokati i Nuhi Ukës, Tahir Rrecaj.
“Jemi njoftuar se seancat e parapara të mbahen këtë javë në rastin e pronave janë shtyrë për shkak se ende nuk ka hyrë në fuqi ligji për mandatin e EULEX-it,” tha Rrecaj, për kallxo.com.
Seancat e mundësisë së veçantë hetuese ishin caktuar pas kërkesës së prokurorit të rastit Danilo Cecarrelli.
Në seancat e mundësisë së veçantë hetuese, një panel prej 3 hetuesish mund të marrin në pyetje dëshmitarë që mund të ndodhë të mos jenë të pranishëm në procesin gjyqësor dhe dëshmia e dhënë në këto seanca konsiderohet pastaj si e dhënë në seancat gjyqësore.
Nuhi Uka, Artan Vila, Hajrullah Berisha, Sabedin Haxhiu, Lubisha Vujoviq, Ilaz Syla dhe Avni Maxhuni ishin arrestuar më 27 prill të këtij viti pas një aksioni masiv të EULEX-it dhe Policisë së Kosovës, ndërsa Azem Syla ishte dorëzuar në polici dy ditë më pas.
52 persona po dyshohen nga prokuroria se kanë tjetërsuar prona shtetërore në mënyrë joligjore në regjionin e Llapnasellës, për çka të gjithë të dyshuarit janë deklaruar të pafajshëm.
Seancat e mundësisë së veçantë hetuese ndaj Azem Sylës dhe të tjerëve nisën më 31 maj, ndërsa janë të mbyllura për publikun, për shkak se të dyshuarit ende vetëm po hetohen. /tesheshi.com/
