Çdo ditë e më shumë po shtohen zërat për mbajtjen e zgjedhjeve të parakohshme në Kosovë. Por zëra të tillë po vijnë veç nga taborri i partisë më të madhe në vend PDK-së.
Pasi ditë më parë Kadri Veseli paralajmëroi mundësinë e shkuarjes së vendit në zgjedhje, për një gjë të tillë së fundmi ka folur edhe ish kreu i PDK-së, tani president i vendit, Hashim Thaçi.
Sipas tij, në zgjedhje mund të shkohet vetëm në dy mënyra: “nëse kjo mazhorancë e humb fuqinë e Kuvendit të Republikës së Kosovës, apo në rast të marrëveshjeve të tyre politike”. Këto komente ish kryeministri Thaçi i bëri sot gjatë homazheve te vendi i rënies së dëshmorëve Afrim Zhitia dhe Fahri Fazliu në lagjen “Bregu i Diellit” në Prishtinë.
Ai ka deklaruar se deri më tani asnjëri prej partnerëve të koalicionit qeverisës, as PDK e as LDK nuk kanë gtrokitur në derën e tij për të folur për zgjedhjet, por shton se si president i vendit është i obliguar t’i kryejë detyrat kushtetuese dhe ligjore.
Se koalicionit qeverisës po i vije fundi, po dëshmojnë edhe zërat kundër të partive në pushtet për mënyrën se si është shpërndarë buxheti për vitin 2017-të.
Pavarësisht këtyre zërave, LDK-ja parti që udhëhiqet nga kryeministri Isa Mustafa vazhdon të pohojë se nuk ka arsye të shkohet në zgjedhje të reja. /tesheshi.com/
