Një shqiptar i rrallë është shfaqur në “Pasdite në Top Channel”, duke rrëfyer jetën e tij e shpërfaqur atdhedashurinë. Kostandin Ristani, njeriu të cilit vendi i largët i ka besuar drejtimin e një strukture të rëndësishme të NATO-s, tha se ishte larguar nga Shqipëria në vitin 1992, për të vijuar më pas jetën në Kanada, ku me shumë ambicie e sakrifica, ia kishte dalë të ndërtonte një karrierë të shkëlqyer.
“Megjithëse isha diplomuar për inxhinieri ndërtimi në Shqipëri, unë u largova atje si një askush, pasi në vitin 1992 më hoqën nga puna. Kam nisur Universitetin gati 40 vjeç, në vitin 1993, për Shkenca Kompjuterike. Aty isha shqiptari i parë që studioja dhe drejtuesit më thanë se ti do të jesh edhe një precedent në vazhdim, nëse del mirë me studime do iu japësh mundësinë në të ardhmen studentëve të tjerë shqiptarë që të studiojnë këtu. Pasi u diplomova, kam punuar në zyrën e statistikave atje. Ndërkohë 10 vite më parë përmes një konkursi u bëra pjesë e Ministrisë së Mbrojtjes kanadeze. Aktualisht drejtoj këtë strukturë të rëndësishme në NATO”, tha Ristani.
Rrezatimin më të madh të personalitetit të tij, edhe si njeri atdhedashës, ai e shpalosi kur shfaqi gadishmërinë për t’u kthyer në Shqipërinë, nëse dikush do ia kërkonte t’i shërbente asaj me përgatitjen dhe aftësitë e tij.
“Unë jam i gatshëm të kthehem e të jap kontributin tim nëse dikush më fton në Shqipëri. Unë kam arritur gjithçka që kam pasur ambicie. Jam mjaftueshëm i pasur dhe nuk vuaj për pasuri. Për Shqipërinë do të vija në çdo moment nëse kërkohet ndihma ime”, tha Konstandin Ristani, emri i të cilit bëhet i ditur për herë të parë për publikun si një shqiptar i rrallë në suksesin e tij jashtë. /tesheshi.com/
