Një shqiptar nga Maqedonia, Mirsad Ziberi, i ka dërguar redaksisë së portalit tesheshi.com një set fotosh realizuar në disa segmente të vijës bregdetare të plazhit të Spillesë, ndër më të preferuarit vitet e fundit, sidomos prej tyre.
Por nuk janë foto të qëlluara artistike, janë foto me motiv denoncues mbi faktin se, ne si shqiptarë, nuk e trajtojmë ambientin siç duhet, nuk kujdesemi fare për pronën publike, dhe mbi të gjitha nuk i çmojmë dhe përfitojmë prej pasurive të shumta natyrore që posedojmë.
Në objektivin fotografik të shqetësimt janë fiksuar pamje mbeturinash në bregdet, ndërtimesh pa sens, e gjithëfarë objektesh të çuditshme, pjesë e një dekori aspak piktoresk siç duhej të ishte.
Në to janë dhe dy bunkerë të ngulur në rërën e plazhit, trashëgim nga koha kur i huaji nuk ishte turisti që do vinte tek ne të shplodhej, relaksohej, e të linte ca para në xhepat tanë; por armiku që duhej vrarë me patjetër, pasi vinte për të na robëruar dhe rrëmbyer fitoret (ideologjike).
Dhe ajo që meriton të veçohet ndër dhjetra foto, është njëra në të cilën dallohet një detaj tërheqës: një flamur i LSI-së i shqyer. (Janë dy madje).
Ai valëvitet aspak krenar (gjersa është i shqyer) mbi një objekt prej dërrase, që nuk është e qartë se ç`funksion kryen aty në plazh: vilë pushimi apo barrakë peshkatarësh.
Autori i fotos ndoshta nuk e ka dalluar fare detajin në fjalë, pjesë e jetës politike shqiptare; apo nëse e ka dalluar, të ketë patur si qëllim përfshirjen e tij tek objektet që e ndotin bregdetin tonë të mrekullueshëm; por ne si redaksi nuk mund të mos shprehim pezmin që një ndër partitë qeverisëse, siç është LSI-ja, të rezultojë flamurshqyer! /tesheshi.com/
