Nga Mensur Krasniqi
Një vit më parë, tesheshi.com publikoi si skandaloze vendimin e komunës së Gazi Babës(Shkup) që t’i ndalohet komunikimi joformal në gjuhën amtare(shqipe), një të punësuari shqiptar brenda këtij institucioni. Ajo që tronditi edhe më shumë opinionin, posaçërisht atë shqiptar, ishte vendimi i Komisionit për Antidiskriminim që parimisht e hodhi poshtë duke e vlerësuar si të pabazë ankesën e Ajet Rexhepit i cili pretendonte se ndaj tij është kryer diskriminim gjuhësor. Mirëpo insistimi, dëshira dhe guximi i tij që të ballafaqohet deri në fund me drejtësinë, bëri që sot Ajet Rexhepi të jetë krenar me veten, meqë përfundimisht pas ankesave të njëpasnjëshme, Komisioni për Antidsikriminim ndryshoi vendimin, kësaj rradhe duke konstatuar diskriminim për shkak të përkatësisë etnike dhe gjuhësore nga ana e organit të vetëqeverisjes lokale ndaj të punësuarit.
Këtë e bëri të ditur eksluzivisht për tesheshi.com vetë Ajet Rexhepi.
Sipas tij, rasti në fjalë, gjegjësisht konstatimi për diskriminim etnik dhe gjuhësor nga ana e organit të vetëqeverisjes lokale ndaj një të punësuari paraqet preçedencë në komunën e Gazi Babës. Ai më tutje rrëfen në detaje rrjedhën e procedurës së këtij diskriminimi.
“Më në fund, drejtësia e pa dritën në fund të tunelit. Drejtësia doli në sipërfaqe. Kjo është hera e parë që në Republikën e Maqedonisë Komisioni për Mbrojtje nga Diskriminimi të konstaton diskriminim për shkak të përkatësisë etnike dhe gjuhësore nga ana e organit të vetëqeverisjes lokale, gjegjësisht të Komunës Gazi Babë – Shkup ndaj meje, Ajet Rexhepot. Paraprakisht, udhëheqësja e paligjshme e sektorit të financave, Marika Zafirovka më ka ndaluar të përdorë gjuhën shqipe në formë joformale në suaza të hapësirave zyrtare në Komunë, ndërsa këtë vendim të saj, unë e kontestova me parashtresë deri te Avokati i Popullit dhe deri te Komisioni në fjalë. Komuna e Gazi Babës, në vend që ta dënon dhe ta defuqizon këtë shkelje të rëndë të Kushtetutës dhe ligjeve të Republikës së Maqedonisë, i shkoi mbas dhe e përkrahi këtë vendim diskriminues të saj, me çrast, Komuna si organ i vetëqeverisjes lokale e vazhdoi edhe më tutje diskriminimin ndaj meje. Tani vendimi është i qartë dhe Komuna e Gazi Babës ka bërë haptazi diskriminim për shkak të përkatësisë etnike dhe gjuhësore të nëpunësit të saj shtetërorë”, deklaroi për tesheshi.com Ajet Rexhepi.
Kujtojmë se vendimi i Komisionit për Antidiskriminim në disfavor të komunës Gazi Babë vjen në një moment kritik dhe mund të jetë një goditje e madhe, pasi që me këtë komunë udhëheq partia nacionaliste, VMRO-DPMNE e cila në asnjë mënyrë nuk lejon dygjuhësinë në shtet. Si pasojë e mopranimit të dygjuhësisë si një nga pikat kryesore të partive shqiptare, VMRO nuk arriti të formojë qeveri me partnerin koalicionues, BDI-në.
Në fund mund të thuhet se atë që nuk mundi ta bëjë dot BDI-ja në 15 vite në qeveri, e bëri Ajet Rexhepi, që askush mos t’ia ndalojë përdorimin e gjuhës amtare nëpër institucione. /tesheshi.com/
