Banorët shqiptarë të lagjes ‘Kroi i Vitakut’ janë ndarë të dëshpëruar të mërkurën, pasi që nuk janë lejuar të fillojnë rindërtimin e shtëpive të tyre të djegura dhe shkatërruara gjatë luftës nga forcat ushtarako-policore serbe.
Takimi i dy kryetarëve të Komunave të Mitrovicës jug dhe veri , Agim Bahtiri, Goran Rakiq, si dhe shefja e Zyrës Administrative të Kosovës në veri të Mitrovicës, Adriana Hoxhiq, si dhe banorë serb dhe ata shqiptarë të lagjes, është zhvilluar me shumë tension në mes të palëve.
“Unë nuk i besoj kësaj marrëveshje e cila është arritur në mes të dy kryetarëve dhe banorëve serbë të lagjes”, ka thënë përfaqësuesi i lagjes ‘Kroi i Vitakut’’, Nazmi Ismajli, duke shtuar:
“Ne kemi pasur një marrëveshje paraprake që është dashur të presim për një muaj, pra deri më sot më 20 maj, dhe sot vijnë këtu e na thonë se duhet të formohet një komision ndërministror ku do të jenë të pranishëm përfaqësuesit e lagjes shqiptarë e serbë. Ky është vetëm një mashtrim i radhës, pasiqë edhe vitin e kaluar kështu na kanë thënë dhe është dashur të presim një vit dhe ai komision nuk është formuar, kështu që ne ngelëm pa i rindërtuar shtëpitë tona.
Unë, si përfaqësues i lagjes, sot nuk kam mundur të marr asnjë vendim, pasiqë nesër do të bisedoj me banorët shqiptarë dhe të shikojmë se çka do të vendosim të presim formimin e komisionit ndërministror apo të fillojmë rindërtimin e shtëpive”.
Në anën tjetër, Agim Bahtiri, Kryetar i Komunës së jugut të Mitrovicës pas takimit ka theksuar se “sot jemi pajtuar të gjithë që të formojmë një grup ndërministror ku do të janë prezent serbë dhe shqiptarë dhe pastaj do të filloj puna në rindërtimin e shtëpive të shqiptarëve”.
Por Bahtiri nuk ka qenë në gjendje të jep një datë të caktuar se kur do të filloj rindertimi i shtëpive të shqiptarëve të djegura gjatë luftës.
Ndërsa Goran Rakiq, kryetar i veriut të Mitrovicës, ka theksuar se ka qenë një takim jashtëzakonisht shumë të vështirë por që kemi arritur rezultate.
“Është me rëndësi që edhe banorët serbë janë pajtuar që banorët shqiptarë të kësaj lagjeje të kthehen në shtëpitë e veta”, ka thënë Rakiq.
Ndërsa shefja e Zyrës Administrative për veriun e Kosovës, Adriana Hoxhiq, tha: “Për herë të parë pas 5 viteve është duke u punuar shumë seriozisht në kthimin e të gjithë të zhvendosurve”.
Sipas saj vetë, involvimi i ministrive dhe ambasadave të huaja flet shumë për seriozitetin e këtij grupi që është formuar sot.
Takim i dy kryetarëve dhe shefes së Zyrës Administrative me përfaqësuesit serb dhe shqiptarë është mbajtur ndaras. /TESHESHI.COM/
