Nga Mensur Krasniqi
Dygjuhësia, kushti kryesor në Platformën Shqiptare e cila po çon në opozitë VMRO-në, stoike për të mos e pranuar, dhe po afron pranë pushtetit LSDM-në, e gatshme për ta pranuar vetëm të rivijë në pushtet, po nxit debate të mëdha në politikën dhe shoqërinë maqedonase.
Ka në fillim një paradoks: deri më tani, për vite me radhë kreu i BDI-së, Ali Ahmeti, e ka quajtur dygjuhësinë si arritjen më të madhe të forcës së ti; ndërsa çuditërisht e vendos si kusht atë për koalicion të ri qeverisës(!).
Justifikimi ka ardhur nga zëdhënësi i BDI-së, Bujar Osmani, i cili i ftuar në emisionin Rruga Drejt të Alsat-M, pranoi se gjatë 15 viteve të fundit asnjëherë nuk është krijuar rrethanë e duhur politike që të mundësonte përmbylljen e të vetmes temë e cila ngeli e pazgjidhur nga Marrëveshja e Ohrit, që është pra gjuha shqipe.
Edhe ai e konfirmoi faktin se gjatë negociatave me LSDM-në, është rënë dakort për një tekst të harmonizuar i cili është një zgjidhje optimale dhe që përmbyllë këtë temë.
I pyetur nëse gjuha shqipe do të praktikohet edhe në banknota e monedha, Osmani deklaroi se në nenin 8 të ligjit të ri është paraparë edhe kjo gjë; dhe ku për çdo institucion që nuk do ta respektojë këtë ligj parashihet edhe gjoba prej 5.000 euro.
Por kjo deklaratë e Osmanit ka nxitur reagimin e menjëhershëm të disa zërave maqedonas, ku veçon ajo profesoreshës universitare, Biljana Vankovska. Kjo e fundit i është qasur çështjes me një pyetje ironizuese: “A thua vallë qytetarët e Maqedonisë me etnitet shqiptar do të janë më të pasur nëse paratë do të janë në dy gjuhësi?”
Dhe më tej ka vijuar: “….është tjetër punë që t`u mundësosh qytetarëve përdorimin e gjuhës amë për t`i realizuar të drejtat e tyre, dhe është punë tjetër që për inat ose për ëllime të errëta ta ndryshosh konstitucionin e shtetit. Kuptohet, edhe unë nuk e kam parë tërë ligjin dhe çka parasheh ai saktë, por nëse Bujar flet për nenin 8 të ligjit të cilët e kanë hartuar partitë shqiptare dhe i cili nuk ka qenë lëndë e bisedimeve, pasi që ka qenë kusht për koalicionim, atëherë 20 njerëz e kanë marrë peng parlamentin, ndërsa 100 kolegë të ture janë vetëm figura që duhet të votojnë diçka e shkruar nga Osman Kadriu (ekspert juridik i BDI-së – sh.r) dhe e miratuar nga disa parti shqiptare”, shkroi në Biljana Vankovska në FB.
Sipas Vankovskës, a nuk është nënçmuese për shqiptarët ajo që si fitore e BDI-së të paraqitet dygjuhësia në para, uniformat policore dhe të armatës e të ngjashme, e nga ana tjetër të mos kenë bukë për të ngrënë?!
Gjithashtu, nuk kanë të ndalur edhe komentet satirike të qytetarëve lidhur me zyrtarizimin e gjuhës shqipe.
Një status interesant që me të madhe po qarkullon në facebook, thotë kështu: “Beneficionet më të mëdha të zyrtarizimit të gjuhës shqipe, do ti ketë vetë BDI si subjekt politik, meqë nëse e përkthejmë shqip “MUZEU I VMRO-së”, do i bie “MUZEU I BDI-së”, ja përfitimi i parë nga zyrtarizimi i gjuhës shqipe për BDI-në”.
Përveç gjuhës shqipe, nëpër disa media maqedonase janë bërë të ditura edhe ministritë të cilat ia ka ofruar LSDM-ja BDI-së. Mirëpo lidhur me këtë asnjë nga përfaqësuesit i kësaj të fundit nuk kanë dalë me qëndrim zyrtar.
Por formimi i qeverisë së re nuk do jetë aq i lehtë sa e paraqesin partitë negociuese, LSDM-BDI, pasi VMRO ka vendosur të dalë me protesta në rrugë nën moton “Maqedonia e maqedonasve”. /tesheshi.com/
