Në mbledhjen e përbashkët të qeverive të Shqipërisë dhe Kosovës që do të mbahet më 27-28 nëntor 2017 në Korçë do të vendoset për krijimin e lehtësirave për qytetarët shqiptarë që jetojnë në dy shtete.
Një ndër to do të jetë edhe bashkimi doganor në portin e Durrësit, njëlloj si në pikën kufitare të Morinës, ku kryet kontroll vetëm një herë.
Kryeministri Edi Rama në një konferencë të përbashkët për mediat me homologun nga Kosova, Ramush Haradinaj, njoftoi se është rënë dakord për njehsimin e doganës së Shqipërisë dhe Kosovës, edhe në portin e Durrësit.
“Bashkim doganor në Portin e Durrësit, I cili do të kthehet në doganë të njehsuar të Shqipërisë dhe të Kosovës. Është e pajustifikueshme që sipërmarrjet shqiptare që çojnë mall në Kosovë të kontrollohen dy herë dhe të përballen me dy palë doganierësh. Këtë kemi rënë dakord ta finalizojmë në mbledhjen e 27 nëntorit”, u shpreh Rama.
Në vijim, ai shtoi se muret absurde që ndajnë kufijtë duhet t’i shembim bashkarisht.
“Për ta filluar vitin e ardhshëm me një kufi simetrik në ngjashmëri me kufijtë mes vendeve të BE- një kufi europian për Shqipërinë dhe Kosovën. Nuk do të hiqen kontrollet, por do të jenë aq të rralla, sa që shumë kujt mund t’i ndodhë të mos ketë asnjë kontroll gjithë jetën”, tha Rama
Sipas kryeministrit, këto hapa përbëjnë bashkimin kombëtar, që nuk është gjë tjetër veçse një luftë e përditshme për të unifikuar një hapësirë të përbashkët.
Por, kryeministri Rama, zbuloi edhe një sekret për homologun e tij Haradinaj, I cili ka shtetësinë shqiptare dhe është I regjistruar si banor në njësinë nr 5 në Tiranë.
“Urime edhe për ju si banor i njësisë numër 5 në Tiranë ku ne kemi deputet Pandeli Majkon”, tha Rama, ndërsa I shprehu mirëseardhjen homologut të Kosovës, Ramush Haradinaj. /tesheshi.com/
