Mbi 100 gazetarë, hodhën para godinës së qeverisë kurorën e funeralit me të cilën mbrëmë një person i panjohur shqetësoi familjen e gazetarit Borjan Jovanovski, duke i dorëzuar kurorën bashkëshortes së tij.
Me aktin e sotëm, gazetarët lënë të nënkuptohet se e dinë porositësin e këtij akti qyqarë.
Motra e gazetarit, Svetllana Jovanovska, tha se kërcënimi i mbrëmshëm paraqet akt brutal të paparë deri më tani.
“Mbrëmë, kur është dorëzuar kurora, në shtëpi kanë qenë vetëm fëmijët e tij të mitur, të cilët u shqetësuan jashtëzakonisht. Unë jam gazetare në Bruksel, dhe mendoj se kësaj duhet ti vijë fundi”,- theksoi Jovanovska.
Gazetarja Biljana Sekullovska, kolege e gazetarit Jovanovski në median “Nova Tv” kërkoi nga policia të garantojë siguri për gazetarin e kërcënuar me jetë, ndërsa përveç kësaj në tubimin protestues para qeverisë nga gazetarët u kërkua edhe reagim i prokurorit publik, pasi siç thanë, herën tjetër dikush mund edhe të pësojë./tesheshi.com/
