Nga Donat Maloku
Familja pesëanëtarëshe e Nezir Gelës, 89-vjeçar, nga fshati Mihaliq i Komunës së Vushtrrisë, jeton në kushte shumë të rënda, jo për mungesë shtëpie apo ushqimi, por për mungesë përkujdesje.
Në këtë familje, përveç Nezirit, anëtarët e tjerë të familjes vuajnë nga probleme të ndryshme shëndetësore, kryesisht psikike, që këta familjarë i bënë të paaftë që të përkujdesen për veten e tyre.
“Të gjithë robët e shtëpisë janë të sëmurë dhe nuk po mundem që të përkujdesem për to pasiqë i kam bërë 89 vjet”, rrëfen Nezir Gela. Edhe bukën nuk po ka kush me na e gatua, vetëm unë gatuaj për të gjithë këta rob që i kam”, thotë Neziri.
“Shtëpinë ma kanë ndërtuar Ahmet Zariqi, Beqir Vershevci e një Zhegrovë, emrin nuk ia di, por me na mbajt nuk ka kush, me fshi e me la nuk po mundem”, shprehet plaku.
“Disa herë kam qenë në Komunën e Vushtrrisë me bisedu me kryetarin, por nuk e kam zatet, kam fol me do tjerë, por deri më tani askush nuk më ka ndihmuar diçka. Jam tu prit ndoshta dikush del e na ndihmon se kështu nuk po mundem me jetu, këto çikat që i kam nganjëherë ngatërrohen mese veti dhe po kam shumë probleme, takati më ka lëshu” ka rrëfyer Neziri.
“Po po, harç po më bien boll, do njerëz e kryesor është Mehmet Merrnica, i cili shumë shpesh na viziton, na vjen edhe Ahmeti dhe na sjell harçë, po kush me gatua, unë 89 vjeç, më nuk po mundem”, ka thënë Neziri.
Familjes Gela, ka mbi katër vite, që tre ndërmarrës vushtrrias iu kanë ndërtuar shtëpinë e re.
Ahmet Zariqi, një nga donatorët për ndërtimin e shtëpisë, përkitazi me gjendjen e familjes Gela ka pohuar se kanë bërë gabim që ua kanë ndërtuar shtëpinë.
“Të kuptohemi, nuk jemi pishman që e kemi bërë atë punë, por ata familjarë nuk janë në gjendje të përkujdesën për veten e tyre, e le më ta mirëmbajnë shtëpinë” ka thënë Zariqi.
Sipas tij , zgjidhja e vetme për familje e Nezir Gelës, është shteti.
“Shteti duhet ti marrë ata nënë përkujdesje, pra t`i dërgojë në Qendrën që e kanë në qytetin e Shtimjes”. Nuk ka zgjidhje tjetër për këtë familje, kanë ushqim, por nuk ka kush t’iu gatuaj, nuk dinë të punojnë me ushqimin që po ju dërgojmë, ne edhe në të ardhme do t’iu dërgoj gjëra ushqimore por kjo nuk është zgjidhje”, ka thënë Zariqi.
“Shtëpinë iu kemi ndërtuar, por rrymën elektrike nuk kemi guxuar t’iu lidhim në rrjet, pasi që ata persona nuk janë të vetëdijshëm se çfarë pasojash mund të kenë nga rryma, pra vetëm kjo flet shumë për gjendje shëndetësore të këtyre personave” ka shtuar Zariqi.
Familja Nezirë Gelës, jeton në pjesën e epërme të fshatit Mihaliq, në një vend larg fqinjëve, në mesë të malit, në një shtëpi që nuk ka as rrymë elektrike dhe as ujë të rrjedhshëm.
Shtëpia me tri dhoma, që nga jashtë dukej e re me tu futur brenda kundërmon një erë shumë të rëndë, pothuajse e papërballueshme për njerëz.
Në gjithë dhomën e ndenjes ishin të shtrirë sfungjer e dyshek të ndryshëm, ndërsa që për anash e mbrapa derës ishin të vendosur gjërat ushqimore si dhe një tërfurk i hekurit që shërben për largim të mbeturinave të kafshëve.
“Tërfurkun më duhet për sigurinë time dhe të familjes dhe për atë e mbaj brenda në dhomë”, ka thënë Neziri.
Në anën tjetër zyrtarë komunal të Vushtrrisë i kanë theksuar se jemi të njoftuar për gjendjen e rëndë në të cilën jeton familja e Nezirë Gelës.
“Kemi vizituar disa herë atë familje, kemi bërë një kërkesë për transferim të kësaj familje në institucione përkatësi si është në Shtimje, që është zgjidhja e vetme” ka thënë Avdullah Klinaku , Drejtor i Drejtorisë për Mirëqenie Sociale në Komunën e Vushtrrisë.
“Për këtë rast që është shumë i rëndë kemi njoftuar edhe Ministrin e Punës dhe Mirëqenies Sociale duke kërkuar edhe nga ata që të intervenojnë që sa ma parë kjo familje të transferohet në Shjtimje, në institucionin për përkujdesje për njerëz me nevoja të veçanta” ka thënë Klinaku.
Sipas tij “deri më tani nuk kemi marr asnjë përgjigje dhe jemi në pritje, por nuk do të qëndrojmë duar kryq, pasi që gjatë kësaj jave, do të shkojmë në Ministri dhe do të interesohem për transferimin e kësaj familje”.
Ai ka shtuar se kjo familje nuk ka as rrymë elektrike e as ujë të rrjedhshëm, pasi që donatorët janë këshilluar nga Institucionet Komunal dhe ata të Sigurisë se është rrezik shumë i madhe me lidhe këtë shtëpi në rrjetin elektrik.
“Anëtaret e kësaj familje mund të vdesin, pasi që nuk dinë se me çfarë pasojash mund të përballen nëse vijnë në kontakt me energjinë elektrike” ka thënë i pari i mirëqenies sociale në Vushtrri.
Komuna kësaj familje i ndihmon me gjëra ushqimore, por duhet theksuar se janë disa persona nga Vushtrria, që iu kanë ndërtuar shtëpinë, por edhe që në mënyrë permanente iu dërgojnë gjëra ushqimore ka thënë Klinaku. /tesheshi.com/
