Jurgen Gjasula i ka dhënë barazimin skuadrës së Alenit në përballjen me Karlsruherin. Një ndeshje e shkëlqyer për mesfushorin e Kombëtares kuqezi, pasi ka arritur të shënojë një dopietë në barazimin 2-2. Takimi ka nisur keq për Alenin, pasi është ndëshkuar me gol që në minutën e dytë, shkruan “Panorama Sport”.
Në minutën e 54-t, Gjasula shndërron në gol një penallti, madje duke e shmangur portierin në
kahun e kundërt, për t’i dhënë barazimin e përkohshëm Alenit. Një gol që nuk ka vlejtur shumë, pasi skuadra mike ka shënuar edhe një herë tjetër për të kaluar sërish në avantazh. Forma e mirë e Jurgen Gjasulës ka vijuar gjatë gjithë ndeshjes dhe shqiptari ka shënuar sërish.
Një gol që ka barazuar ndeshjen dhe që i ka dhënë një pikë të artë skuadrës së Alenit. Skuadra e mesfushorit shqiptar është duke kaluar një periudhë të vështirë, pasi gjendet në vendin e parafundit me vetëm një pikë më shumë sesa vendi i fundit i Bundesligës 2, ndërkohë që barazimi ka ardhur ndaj Karlsruherit, që është aktualisht në vendin e katërt në tabelën e renditjes. /tesheshi.com/
