Kryetari i Prishtinës, Shpend Ahmeti, ka thënë se i kujtohet pak ministri aktual i Bujqësisë, Nenad Rekalo, i cili është vënë në shënjestër të disa mediave dhe të disa banorëve të Prishtinës me pretendime se ka marrë pjesë në tortura të shqiptarëve gjatë luftës.
Një ditë pasi Rikalo, përmes një letre shpjegonte raportet që ka pasur me Ahmetin dhe Albin Kurtin, ndërsa mohonte akuzat ndaj tij, kryekomunari i Prishtinës ka sqaruar se me Rikalon është takuar një herë në tre muaj sa ishin bashkë në Bordin e Fondacionit për Shoqëri të Hapur.
“S’kam punë unë me të. Unë kam qenë në Bord për Fondin për Shoqëri të Hapur. i zgjedhur nga Fondacioni Soros në Neë York. Aty ka qenë me sa e di edhe Blerim Shala, Muhamet Mustafa, Ilir Deda. Kemi pasur takime njëherë në tre muaj në bord dhe ka pasur një përfaqësues nga të gjitha minoritetet”, ka thënë Ahmeti, në një deklaratë për “Indeksonline”.
Nenad Rikalo, ish-anëtar i KQZ’së dhe i shoqërisë civile, ka reaguar ndaj pretendimeve për krime lufte duke thënë se nuk i ka bërë keq asnjë shqiptari.
Madje, ka treguar se ka bashkëpunuar me shumë udhëheqës partiake e shtetërorë të Kosovës pas përfundimit të luftës.
Ai ka përmendur se ndër bashkëpunëtorë të tij ishin edhe Shpend Ahmeti e Albin Kurtin me të cilin kishin themeluar një OJQ pasluftë
“4 vjet kam qenë anëtar i Bordit në Fondacionin Soros së bashku me Shpend Ahmetin dhe Ilir Dedën dhe me intelektualë të tjerë të shquar nga Prishtina. Në vitin 2003 së bashku me Albin Kurtin kam marrë pjesë në themelimin e KAN-it”, shpjegoi Rikalo. /tesheshi.com/
