Siç raporton BBC-ja, Italia ka shpallur gjendjen e jashtëzakonshme në rajonet e goditura më rëndë nga tërmeti i së mërkurës.
Veç kësaj, kryeministri italian, Matteo Renzi, ka premtuar 50 milionë euro fonde për rindërtimin nga e para të çka është shkatërruar. Janë pezulluar ndërkohë dhe taksat për banorët e këtyre rajoneve.
Numri i atyre që kanë vdekur nga tërmeti deri tani është 267, ndërsa 400 të tjerë janë plagosur. Ekipet e shpëtimit vazhdojnë punën për gjetjen e të mbijetuarve nën rrënoja, por me kalimin e orëve bëhen më të pakta shpresat për të nxjerrë të gjallë që andej.
Lëkundje të tjera kanë pasuar pas tërmetit të parë, siç ishte dhe një e tillë në orët e para të së premtes, me magnitudë 4.7 ballë.
Qytezat më të goditura janë Amatrice, Arquata, Accumoli dhe Pescara del Tronto, ku për shkak të turistëve të shumtë gjatë verës, është e vështirë të ketë shifra të sakta të atyre që nuk janë mes të gjallëve. /tesheshi.com/
