Avokatët që mbrojnë të pandehurit për ngjarjen e “Lagjes së Trimave” në Kumanovë, kanë akuzuar Gjykatën Themelore të Shkupit se po u bën presion në mënyrë që ata të tërhiqen dalëngadalë.
Para një jave, Gjykata e Shkupit ku zhvillohet procesi ka dënuar me 1200 euro gjobë avokatët, vetëm se këta të fundit lanë seancën si shenjë proteste për sjelljen e prokurorisë dhe trupit gjykues.
Avokati Naser Raufi ta akuzoi krerët e gjyqësorit maqedonas se po krijojnë një disiplinë artificiale.
“Jemi të dënuar tre avokatët e mbrojtjes në rastin ‘Lagjja e Trimave’. Ankesat janë hedhur poshtë dhe ky vendim i gjykatës është përfundimtar. Sipas meje, nuk ka baza që të dënohemi, pasi që edhe seanca e fundit me 11 maj u anulua, pasi që ne si mbrojtje reaguam për shkak të asaj se nuk kishte kushte për mbajtjen e seancës në një rast tejet kompleks. Vetë shtyrja e seancës së fundit me 11 maj dhe arsyetimi i trupit gjykues se nuk ekzistojnë kushte, janë dëshmi se këto gjoba janë të pabaza”, deklaroi Raufi. /tesheshi.com/
