Dështon sërish takimi i partive politike në Maqedoni për të arritur një marrëveshje për të përpiluar listën zgjedhore për votimet e parakohshme.
Sicc mësohet, Bashkimi Demokratik për Integrim propozoi që zgjedhësit të regjistrohen me shenjat e gishtërinjve në mënyrë që të mos arrihet të votohet dy herë.
Ndërkaq, LSDM-ja ka bërë thirrje që lista të dalë nga të dhënat e gjendjes civile. Ky propozim është mbështetur edhe nga organizatat jo Fitimprurëse. Ndërkaq nuk është rënë dakord për zgjedhjen e prokurorit special i cili do të kishte kompetenca hetimi.
Sicc njofton Alsat M, përfaqësuesit e partive politike kanë përafruar qëndrimet rreth modalitetit për krijimin e listës zgjedhore dhe përbërjen e KSHZ-së, por ende mungon një marrëveshje përfundimtare.
Partitë nuk mundën të gjejnë gjuhë të përbashkët edhe për menaxhuesin e listës zgjedhore. Opozita kërkon lista të menaxhohet nga KSHZ-ja, ndërsa pushteti kërkon që edhe më tej kompetencat mbi listën zgjedhore ti mbajë Ministria e Punëve të Brendshme.
Në takimin e sotëm është hapur edhe çështja e votimit të diasporës, por nuk është arritur asnjë përafrim qëndrimesh rreth asaj çështjeje. VMRO DPMNE-ja vazhdon të refuzojë propozimet e LSDM-së dhe BDI-së për rritjen e cenzusit për mandat në diasporë, respektivisht heqjen e 3 deputetëve të diasporës.
Grupi i punës do të vazhdojë takimet nesër, por me diskutime rreth prokurorit special dhe me ndërmjetësimin e ekspertit Xhejms Hamilton. Nëse nuk ka kompromis për prokurorin special deri më 14 shtator, atëherë pritet që vendimi të merret nga SHBA dhe BE.
/tesheshi.com/
