Çmenduria e pushtetit aktual për të rimodeluar gati të gjitha objektet publike me fasadë të stilit “Barok”, ka pësuar goditjen e parë. Kryetari i komunsë Qendër të Shkupit, Andrej Zhernovski, bashkë me kreun e Komisionit Shtetëror të Zgjedhjeve, Nikolla Rillkovski, kanë realizuar takimin e parë për të organizuar referendum, në të cilin qytetarët e kësaj komune do të japin verdiktin se çfarë pamje do të marrë Qendra Tregëtare e qytetit, pasi më herët komuna bllokoi propozimin e qeverisë për t`i dhënë pamje “Baroku”.
“Më 26 Prill, komuna Qendër do të mbajë referendum, në të cilin qytetarët do të përgjigjen në pyetjen: A jeni për mbajtje të fasadës autentike të QTQ-së Shkup, ndërsa përgjigja do të bëhet me rrumbullaksim të opsionit Po ose Jo”, thuhet në deklaratën e lëshuar nga komuna.
Referendumi do të jetë i sukseshëm nëse votojnë gjysma e qytetarëve të regjistruar në listën e votuesve, më shumë se gjysma e të cilëve duhet votojnë kundër propozimit të qeverisë, për të cilin disa herë janë mbajtur protesta, në të cilat qytetarë të kapur për dore kanë shprehur pakënaqësinë e tyre dhe kundërshtim gjithashtu.
Në mos me kohën që jetojmë, “Baroku” nuk ka asnjë lidhje me Maqedoninë apo identitetin maqedonas. Dhe çmenduria në këtë rast nuk ka të bëjë me terma financiarë, ku të tilla inisiativa delirante kërkojnë miliona, por me përpjekjet për sajuar një Maqedoni tjetër nga ajo që ofron historia. /tesheshi.com/
