Shkodra nuk mund të kuptohet pa lulet, ndaj, 6 maji për këtë qytet është një festë tradicionale e quajtur ‘festa e luleve’. Prej vitesh kjo ditë është dhe zyrtarisht festë lokale në Shkodër dhe shoqërohet me mjaft aktivitete, në qendër të të cilëve janë lulet. E përcjellë prej vitesh në breza, dashuria e kujdesi për lulet, ka qëndruar i pazbehur tek qytetarët shkodranë.
Kanë qenë fëmijët e kopshteve dhe shkollave 9-vjeçare të qytetit ato që me lule ndër duar dhe të zbukuruar me simbolet e tyre kanë mbushur rrugët e qytetit duke performuar nën tingujt e këngëve të moshës.
Panairi i artizanatit dhe ai i luleve i kanë dhënë një pamje të veçantë pedonales në qendër të qytetit ndërsa nuk kanë munguar as këngët për lulet, ku dihet se Shkodra ka 150 këngë kushtuar luleve ndër vite. Të shumtë janë oborret e familjeve shkodrane që lulet i kultivojnë e i ruajnë me kujdes.
Një prej tyre është dhe i moshuari Adnan Muka. Dhe pse në moshë të thyer, ai kujdeset dhe oborri i tij ka një pamje të veçnatë prej luleve të shumëllojshme.
Një koleksion i veçantë trëndafilash natyror por dhe lulesh të tjera si dhe 45 lloje varietetesh të ndryshme i japin pamje të veçantë oborrit të banesës së tij private.Siç thotë vetë Adnani, ai ka pasion të veçantë trëndafilin natyror, ndërsa janë 45 lloje lulesh të krijuara prej tij të cilave ai u ka vënë emra të ndryshëm.
Ndër ta janë 10 lloje trëndafilash që mund të përdoren në parqe publike, ndërsa shumë varietete janë bërë nga kryqëzimi me bletët. Dita e luleve është ndër më të veçanta në këtë qytert dhe festohet në mënyra të ndryshme nga banorët e tij.
Përgatiti: Anila Dushi
