Këshilli Mbikëqyrës i Operatorit të Shpërndarjes së Energjisë Elektrike mori sot vendimin për lirimin e drejtorit “teknik” Haki Mustafa nga detyra e administratorit të shoqërisë OSHEE sh.a.
Me një vendim tjetër u kthye në detyrë Adrian Çela, drejtori i mëparshëm i PS-së.
Haki Mustafa është i vetmi nga “teknikët”, ministra e drejtorë, që u largua nga detyra pasi e mori atë në kuadër të marrëveshjes Rama- Basha për zgjedhjet e 25 qershorit.
Ndërkaq ministrat “teknikë” të PD-së vijojnë punën dhe betejën e tyre me vartësit.
Ministrja e Arsimit, Mirela Karabina, është në konflikt me sekretarin e përgjithëshëm Plarent Ndreca.
Ministrja e PD tha sot se Ndreca ka firmosur dje një Kontratë Shërbimi me një Kompani Kontraktore, duke krijuar situatë të paprecedentë në një institucion shtetëror.
Po kështu Karabina ka theksuar më tej se Ndreca “në mjediset e ministrisë lëviz me persona të armatosur”.
Sipas Ndrecës arsyet e konfliktit mes tij dhe ministres teknike janë pikërisht se Karabina nuk ka të drejtë ligjore të emërojë dhe shkarkojë pa prova punonjës të Ministrisë. Ai i ka sjellë si dokument edhe shkresën e Ministrisë së Financave që shkarkimi i tij nuk është kërkuar nga MAS./tesheshi.com/
