Nga Ylli Pata
Lufta për Trepçën edhe pse nuk po merr mbrojtjen reale politike në Kosovë apo edhe nga shqiptarët në tërësi, përfaqëson një nga burimet vitale të shqiptarëve,
Nuk ishte rastësi marrja e veriut të Kosovës nga Serbët në vitin 1989 pasi ata e kanë dashur gjithmonë Trepçën.
Nuk është as rastësi greva e vitit 1988 kur minatorët aty filluan lëvizjen për liri kundër komunizmit.
Ndaj dhe serbët u irrituan dhe ia hoqën autonominë Kosovës.
Kryeministri Aleksandër Vuçiç ka thirrur të martën një mbledhje të jashtëzakonshme të qeverisë për të marrë masa që të anulojë vendimin e qeverisë së Kosovës për shtetëzimin e Trepçës.
Po pse për serbët është kaq e rëndësishme Trepça, madje aq sa trajtohet në një nivel me betejën e Fushë-Kosovës?
Për të ilustruar këtë argument, iu drejtuam gazetarit veteran të Kosovës, Behlul Jashari dhe shënimeve të tij të çmuara.
Jashari, thekson se 20 vite më parë, pikërisht në vitin 1996 ka intervistuar ish-drejtorin e Trepçës, Aziz Abrashi, i cili i ka deklaruar se “miniera e Trepçës vetëm në një vit nxirrte 270 kg ar dhe 113 ton argjend të pastër”.
Në vitin 1996, presidenti i ndjerë i Kosovës, Ibrahim Rugova, i kërkoi Zvicrës që të ngrinte depozitat e arit të Jugosllavisë, pasi shumica ishte grabitur nga miniera e Trepçës.
Zvicra natyrisht nuk i ngriu por as nuk i ktheu. Me prishjen e Jugosllavisë është mister kush e ka tërhequr sasinë gjigande të arit.
Nxjerrja e arit nga minierat e Trepçës është mbajur sekret gjatë gjithë ekzistencës së Jugosllavisë dhe i gjithë prodhimi dërgohej menjëherë në Beograd në magazinën e thesarit të shtetit, që mbahej në survejim të fuqishëm.
Ndërkaq, në kohën e UNMIK-ut, ekspertët e saj theksonin se rezervat e Trepçës kanë 60.5 milionë ton minerale me ngjyrë: 4.96% ar, 3.3% zink dhe74.4 gr/tonë argjend, që përkthehen tre milion ton ar, dy milion ton zink dhe 4,500 ton argjend. /tesheshi.com/
