Palestinezët po kërcënojnë të ndërpresin të gjitha komunikimet me administratën e Presidentit të SHBA Donald Trump, në rast se ai planifikon mbylljen e një misioni palestinez në Uashington.
Kryenegociatori palestinez, Saeb Erekat tha se vendimi i administratës amerikane ishte “shumë i trishtuar dhe i papranueshëm”, njofton AP.
Ai akuzoi Shtetet e Bashkuara se janë gjunjëzuar nën presionin e kryeministrit izraelit Benjamin Netanjahu.
Netanyahu në anën tjetër ka komentuar se mbyllja e misionit palestinez është “një çështje e legjislacionit amerikan”.
Administrata amerikane njoftoi të shtunën me autoritetet palestineze se do të mbyllin zyrën e tyre në Uashington nëse ata nuk fillojnë “bisedime serioze të paqes” me Izraelin, njoftuan zyrtarët e SHBA të shtunën.
Shefi i diplomacisë palestineze, Riyad Maliki, megjithatë, e dënoi masën e Shteteve të Bashkuara si një përpjekje për “ekstradim”.
Siç njofton AP, Sekretari Shtetëror i SHBA, Rex Tillerson, vlerësoi se palestinezët kanë shkelur një dispozitë të ligjit amerikan që kërkon që Organizata Çlirimtare Palestineze (PLO) të mbyllet nëse ata përpiqen të ngrenë procedurë penale kundër izraelitëve për krimet ndaj palestinezëve përpara Tribunalit Ndërkombëtar të Krimeve.
Departamenti i Shtetit thotë se presidenti palestinez Mahmud Abbas e kaloi atë linjë në shtator, me rastin e parashtrimit të një kërkesë drejtuar gjykatës për të hetuar dhe akuzuar izraelitët.
Nga ana tjetër, Riyad Maliki ka deklaruar se udhëheqja palestineze nuk do të pranojë çfarëdo shantazhi apo presioni lidhur me punën e delegacionit të PLO-së në Uashington apo negociatave.
Ai tha se palestinezët do të presin për komunikim të mëtejshëm me administratën amerikane.
“Topi tani është në oborrin amerikan”, tha ai.
Sipas tij, ky veprim amerikan mund të ketë për synim një ushtrim të presionit mbi palestinezët.
“Udhëheqja palestineze nuk do të pranojë çfarëdo shantazhi apo presioni”, tha ai. /tesheshi.com/
