Gjermania mund të përballojë të paktën 500 mijë azilkërkues në vit, për disa vjet rresht, tha zëvendëskancelari gjerman, Sigmar Gabriel. Por, vetëm këtë vit, Gjermania pret të marrë më shumë se 800 mijë kërkesa për azil, katër herë më shumë sesa të dhënat e 2014-ës.
Për të mbuluar diferencën, janë vendet e tjera europiane që duhet të bëjnë pjesën e tyre.
Kriza e refugjatëve nuk duket se do të zvogëlohet në shifra, pasi vetëm të hënën, sipas OKB-së, një numër record prej 7 mijë personash kaluan kufirin nga Greqia e hynë në Maqedoni, ndërsa 30 mijë refugjatë ndodhen tashmë në ishujt grekë, në kushte të tmerrshme.
Fluksi i emigrantëve ka “sikletosur” qeveritë europiane të cilat kanë mbajtur qëndrime të ndryshme, duke nisur nga Hungaria, autoritetet konservatore të së cilës po ndërtojnë edhe një gardh mbrojtës për të mbajtur larg refugjatët e deri tek Gjermania që ndihet krenare për qytetarët e vet që mikpritën refugjatët. /tesheshi.com/
