Ka qenë paksa e pazakontë një konferencë shtypi në Bruksel e treshes Rama-Vuciç-Kovaçevksi, mbajtur në kuadër të Samitit të BE dhe Ballkanit Perëndimor.
Sërish pa një dritë jeshile për hapjen e negociatave, si pasoje vetos bullgare ndaj Shkupit, Rama tha se i vinte keq për këtë BE.
“Shpreh keqardhjen e thellë për Bashkimin Europian. Më vjen keq për ta dhe shpresojmë që mund t’i ndihmojmë.
U përpoqa të thoja disa gjëra në takim dhe me ju do të ndaj disa prej tyre sepse nuk dua të marr shumë kohë. Michel na tha që kemi kohë 3 minuta, i thashë që mjaftonin 30 sekonda nëse do të mbanin fjalën. U thashë që ndihesha mirë dhe keq që isha bashkë me ta.
Ndihesha mirë sepse jam europian dhe isha mes europianëve, por ndihesha keq sepse ne këtu nuk jemi si europianë, por si të ftuar në një shtëpi të ndarë. Kjo është shqetësuese. Pandemia dhe lufta kërcënuese që mund të shndërrohet në luftë botërore, nuk kanë mundur të na bashkojnë”, arsyetoi kreu i qeverisë shqiptare.
Më tej, Rama i bëri një skaner BE-së, duke e krahasuar atë me gjendjen shëndetësore të Putinit: “Tema kryesore ishte Maqedonia e Veriut, dikur Maqedoni.
17 vite më vonë, ende është kandidat për çeljen e negociatave. Edhe emrin e ndryshoi dhe nuk bëri dallim. Shqipëria ka 8 vite në pritje dhe m’u desh të fitoja një mandat të tretë dhe ende pres çeljen e bisedimeve. Arsyeja nuk është thjesht Bullgaria, ajo është një fatkeqësi, por arsyeja është fryma e deformuar e zgjerimit dhe Bullgaria është shprehja më e dukshme e saj. Fryma e zgjerimit ka kaluar nga një vizion i përbashkët, te marrja peng nga vende të veçanta.
Çështja e Bullgarisë është një turp, një vend i NATO-s që merr dy vende të tjera të NATO-s, ndërkohë që në Europë ka luftë. Putini mund të jetë i sëmurë ose gëzon shëndet të mirë, por ky vendi këtu nuk duket i shëndetshëm. Agresioni rus ndaj Ukrainës po merr një ndihmë nga një vend i NATO-s, Bullgaria. Po fryhet mllefi dhe pakënaqësia në një fqinjësi si e jona”, ishin fjalët e ashpra të Ramës.
Ai nuk u kursye as për Kosovën, për faktin se ende nuk i liberalizohen vizat.
“Ka një tjetër pengmarrje në proces, që është pengmarrja e qytetarëve të Kosovës, të cilët nuk lejohen të lëvizin lirisht në Europë. Është popullata e vetme në tokën e Europës që nuk mund të lëvizë lirisht.
Ua thashë atyre: ‘a mund ta përfytyroni që nën diktaturën jugosllave, në thelb dy, dhe mund të udhëtonin, mund të shkonin në Gjermani, në Zvicër e mund të shkonin kudo dhe punonin me radhë, por qysh kur u liruan, çliruesit, çlirimtarët e tyre po i mbajnë peng, ata nuk mund të lëvizin’. Kjo është çmenduri, kjo është e turpshme, kjo duhet të marrë fund dhe njerëzit duhet të lejohen të lëvizin lirisht”, tha Rama. /tesheshi.com/
