Ndarja e posteve në nivelin e dytë dhe të tretë në kabinetin e ri të Zoran Zaevit ka ndikuar në acarimin e raporteve ndërmjet partive qeveritare shqiptare BDI-së dhe LR PDSH-së.
Dhe si rezultat i kësaj, Ali Ahmeti e ka parë të arsyeshme që të kontaktojë Menduh Thaçin nga partia opozitare PDSH-së, që eventualisht nëse Ziadin Sela i LR-PDSH-së vazhdon me kërkesat e tij maksimale-dy vota për mbijetesën e qeverisë t’i sigurojë nga PDSH, pasiqë votën e VeselMemedit të RDK-së, Ahmeti e llogarit të sigurt.
Nga zërat në opinion thuhet se kryeministri Zoran Zaev, për partitë shqiptare BDI dhe “Aleanca për Shqiptarët” ka ofruar 6 poste të zëvendësministrave dhe po aq të sekretarëve shtetërore. Përderisa debati i grupeve të punës është fokusuar se në cilat dikastere të marrin zëvendësministra dhe sekretar shtetëror shqiptarët, ekziston edhe një debat brenda dy partive shqiptare se cilës partie, sa poste t’i takojnë.
“Aleanca për Shqiptarët” ka këmbëngulur që postet të ndahen 3 me 3 mes tyre dhe BDI-së, por sipas burimeve tona partia e Ahmetit ka një ofertë tjetër për Aleancën e LR PDSH-së, RDK-së dhe Unitetit. Ahmeti ka ofruar 2 poste të zëvendësministrave dhe 4 të sekretarëve shtetërore duke parashikuar që në konton qeveritare të Aleancës për shqiptarët të ketë edhe një zëdhënës shqiptar të Qeverisë.
Nga Ali Ahmeti është insistuar që LR-PDSH-së t’i ndahet posti i zëvendësministrit të Arsimit, i Punës dhe Politikës Sociale, si dhe një post zëvendësministër për RDK e Vesel Memedit. Kurse kërkesa e LR-PDSH-së është që kësaj partie t’i takojnë tre poste të zëvendësministrit dhe veçanërisht insistohet në atë të Financave ku tash më dihet që për këtë post kandidaturë më serioze është ajo e Adnan Nezirit nga dega e Tetovës.
Shqiptarët kësaj radhe po synojnë se mund të kenë kuadro të nivelit të dytë në Mbrojtje, Ministrinë Brendshme, të Arsimit, Financa, Punë dhe politikë sociale dhe atë të Transportit dhe lidhjeve. Veçmas pakos së zëvendësministrave, akoma nuk dihet se ku partitë shqiptare do të adresojnë sekretarët shtetërorë. M. Hasani – /tesheshi.com/
