Rrëzimi i avionit të kompanisë ajrore Metrojet në Gadishullin e Sinait në fund të tetorit është shkaktuar nga një akt terrorist, ndërsa gjurmë lëndësh shpërthyese janë gjetur në mbetjet e tij. Kjo është ajo çka drejtori i Shërbimit Federal të Sigurimit, Aleksandr Bortnikov, i raportoi presidentit të vendit, Vladimir Putin.
Ekspertët analizuan sendet e pasagjerëve, si dhe pjesë të aeroplanit, ka shpjeguar Bortnikov, dhe pas shqyrtimit të të gjitha këtyre objekteve, ne kemi gjetur gjurmë të një lënde shpërthyese.
“Mund të themi se ishte një akt terrorist,” raportohet t’i ketë thënë ai Putinit.
Aleksandr Bortnikov njoftoi gjithashtu për një shpërblim prej 50 milionë dollarësh të taksur për informacionet që mund të jepen mbi ata që organizuan rrëzimin e avionit.
Nga ana e tij, Putini u zotua për gjetjen dhe ndëshkimin e organizatorëve të aktit terrorist që rrëzoi avionin, duke lajmëruar dhe për vazhdimin e sulmeve ajrore ruse mbi Siri, “Aktiviteti ynë ushtarak në Siri jo vetëm duhet të vazhdojë. Ai duhet të përforcohet në një mënyrë të tillë që terroristët ta kuptojnë se ndëshkimi është i pashmangshëm.”
Avioni rus u rrëzua më 31 tetor në Gadishullin e Sinait, dhe të 224 udhëtarët në të gjetën vdekjen.
Diskutimet mbi arsyen e rrëzimit të avionit kanë vijuar prej javësh. Metrojet-i e pati përjashtuar mundësinë e një defekti teknik, ndërsa zyrtarë britanikë dhe amerikanë folën për një rrëzim të qëllimshëm, të shkaktuar nga një shpërthim. Ndërkaq, si Rusia dhe Egjipti i patën quajtur spekulime më herët zërat për një shpërthim të menduar të avionit. /tesheshi.com/
