Shenja kompromisi mes Moskës e Uashingtonit për Sirinë. OKB pritet të miratojë rezolutën për identifikimin e autorëve të sulmeve kimike në vendin e shkatërruar nga lufta.
Rusët dhe amerikanët janë marrë vesh më së fundmi, për një marrëveshje sa i takon luftës në Siri, për të cilën mbajnë qëndrime të ndryshme që nga nisja e saj katër vjet më parë.
Sekretari amerikan i Shtetit, John Kerry tha se ka arritur kompromis me homolugun rus, Sergei Lavrov për të votuar sot në Këshillin e Sigurimit draft-rezolutën që ka për qëllim identifikimin e autorëve të sulmeve me armë kimike në Siri.
Dy kryediplomatët u takuan në anekset e forumit rajonal në Malajzi.
Rezoluta e hartuar nga amerikanët, që hidhet në votë pas shumë muajsh diskutimesh, i kërkon shefit të OKB-së, Ban Ki-moon dhe agjencisë së OKB-së për armët kimike të formojnë një panel hetimi për të identifikuar autorët e sulmeve në Siri ku janë përdorur gazi klorin dhe agjentë të tjerë vdekjeprurës kimikë.
Rezoluta autorizon panelin të identifikojë individë, grupime, apo qeveri që kanë qenë ekzekutorë, sponsorë apo të përfshirë në përdorimin e armëve kimike. Gjithashtu, ajo hap rrugën për të ngritur padi ndaj përgjegjësve.
Nëse miratohet, rezoluta do të shënonte një ndryshim domethënës në qëndrimin rus ndaj Sirisë.
Rusia është aleate e presidentit sirian, Bashar Al Assad dhe e ka mbrojtur regjimin e këtij të fundit nga të gjitha rezolutat e propozuara në Këshillin e Sigurimit që kërkonin veprim ndaj tij. Kjo ka ndodhur përgjatë katër vjetëve të luftës civile që tashmë ka një bilanc prej 250 mijë viktimash. /tesheshi.com/
