Partia Socialiste po përgatitet për një “vjeshtë përvëluese” brenda radhëve të saj.
Pas një durimi të gjatë 2-vjeçar, kësaj radhe kanë shpërthyer “senatorët” që nga Rama nuk morën atë që pritnin. Janë dhënë dy sinjale të forta që tregojnë një lëvizje tektonike në radhët e së majtës, të cilat padyshim kanë si epiqendër apo vatër, kreun e Lëvizjes Socialiste për Integrim, Ilir Meta.
Fatmir Xhafa, anëtar i kryesisë së PS-së, një nga njerëzit më të rëndësishëm në grupin parlamentar, kryetar i Komisionit të Ligjeve, vetëm dy ditë më parë dha një sinjal të fortë rebelimi, natyrisht duke përdorur gjuhën e njeriut mbi palët.
Në një deklaratë publike, Xhafa sulmoi Ramën e Metën së bashku, pasi sipas tij nuk po tregojnë seriozitet në komunikimin mes tyre. Por më shumë se ndaj Metës, deklarata e Xhafës kishte për “shënjestër” Edi Ramën, i cili që prej zgjedhjeve lokale nuk e ka shtypur në rubrikën e tij të telefonit, numrin e kreut të Kuvendit, Ilir Meta.
Ndërkaq, Arta Dade, tre herë ministre, ish-shefe e diplomacisë shqiptare dhe njeriu që Edi Rama i “hoqi” portofolin e ministres në vitin 1998, ka kryer një performancë politikisht në karshillëk ndaj kryetarit të saj.
Zonja Dade, u shfaq në një aktivitet të LSI-së, duke lavdëruar publikisht Ilir Metën, si politikani më i aftë shqiptar. Po ç’duan të thonë këto sinjale?
Gjithçka duket një atmosferë “lufte të ftohtë” mes armatës së mazhorancës, ku detashmentet rivale po kryejnë manovra për të demonstruar forcën.
Dhe qëndrimet e dy senatorëve ishin një sinjal tregues se Edi Rama mund të mos i ketë të vjetrit e PS-së në krah të tij, nëse plas një luftë me Ilir Metën. Arta Dade e tregoi qartësisht anësimin e saj. Ndërsa Fatmir Xhafa, kreu një demonstrim që përkthehej në rritje pazari për një portofol ministror nëse ribëhet kabineti.
Si hartues i reformës në drejtësi, Xhafa nuk do ta refuzonte postin e zbatuesit, pra të Ministrit të Drejtësisë, nëse ndodh një rrokadë. Por zëra në PS, fjasin për një fortunë më të madhe, e cila sipas të gjitha gjasave nuk do të lërë kohë shumë për llogaritje matematike.
“Flitet për një tronditje kolosale”, theksoi një deputet socialist, që do të ndodhë pas mesazhit të pritshëm të Angela Merkelit në Vjenë…/tesheshi.com/
