Fatos Klosi, njeriu që duhet të ishte më diskreti për shkak të një të kaluare si kreu i shërbimeve sekrete, është sot ndër ata që i jep gojës pa karar për gjithçka.
I njohur si fizikant, politika e morri dhe i dha SHIK-un e lënë nga Gazidede. Dhe, pasi e drejtoi për disa vite këtë instancë delikate shtetërore, ai nisi të shndërrohej në një debatues për shumë çështje, politike po e po, veç atyre që kishin të bënin me natyrën e punës në SHIK, ku sot është shumë e vështirë të besohet se ai ka qenë, e mbetet, të paktën zyrtarisht, një fizikant.
Falë një media-je pa qibar, peng i amatorizmave të frikshme, dhe mu prej atyre që hiqen si elitë e saj, Klosi e të ngjashëm si ai nuk e kanë për gjë që t’i shfaqen opinionit me të drejtën për të folur për çdo çështje.
Të martën mbrëma, Klosi ishte pikërisht në “Opinion”, aty ku zakonisht shpërfaqen bashkë me ndonjë vlerë, edhe anti-vlerat më të zëshme të shoqërisë shqiptare, që më pas i imponohen njerëzisë që rri e i dëgjon me çdo profkë e mendim tallava që u del nga goja.
Ishte për të diskutuar dhe ai për Preng Calin. Po me ç’status vallë? Vetë drejtuesi nuk është i aftë ta përligj se përse duhej zgjedhur, ndër të tjerë edhe Fatos Klosi, për të folur për diçka që në thelb ka brenda histori. Që nuk është historian kjo dihet, por çfarë është atëherë? I apasionuar pas historisë? Po si ai ka më qindra në Shqipëri, qoftë dhe figura publike, por që së paku pasionin e tyre e kanë mishëruar më e pakta me ndonjë shkrim. Mos e ka patur gjë kushëri Prengën? Mos të parët e tij kanë patur të bëjnë me këtë figurë? Sigurisht që nuk u dha asnjë arsye e tillë.
Në një mungesë respekti të theksuar që drejtuesit e Talk Show-ve kanë sot për audiencën, duke e trajtuar atë vetëm si një turmë amorfe, pa tru por vetëm me instikte, për ta bërë të vetën me çdo çmim, duke i dhënë lloj-lloj ushqimi, më së shumti të prishur, nisin e gëlojnë studiove tipa gjithëçfarësh.
Kampion në këtë derexhe është Arian Çani, i pranishëm si analist i rregullt tek Eni Vasili, i cili përveç faktit që drejton vetë një Talk Show karagjoz – gjithsesi zgjedhje e tij – nuk njihet për kompetent në asnjë fushë. Por kjo nuk e pengon atë të jetë i pranishëm në çdo lloj debati, falë pra përzgjedhjes së bërë nga drejtuesja, ku pak ditë më parë ishte ftuar të diskutonte dhe çështje ekonomike me disa ekspertë fushe në tryezë me tituj e grada shkencore(!).
Më tej, është dhe fenomeni i majmunizmit, ku një temë nis e tjerrin të gjitha studiot me radhë, sikur ta kenë me grafik, ku zakonisht të ftuarit janë të njëjtë (shih debatet mbi Skënderbeun).
Dhe në gjithë këtë tjetër lloj kazani, veçon pra garuzhdja e Fatos Klosit që hyn e del në çdo lloj gjelle. /tesheshi.com/
