Nga Bujar M. Hoxha
Ndërsa prej më së paku dhjetë ditësh flitej dendur vetëm për aferat korruptive të kryera mes kompanisë famëkeqe CEZ dhe ofiqarëve të shtetit të mjerë shqiptar, teksa i madh e i vogël po nisnin të mësonin se ç’bëhej me paratë e tyre e ç’të ardhme u gatonin ata që ishin votuar për të qeverisur e jo për të vjedhur, në skenë del një letër e Spartak Brahos, as më shumë e as më pak, por kryetar i Komisionit Parlamentar për Sigurinë Kombëtare.
Në një skemë të njohur tashmë, por jo më me çantë të zezë në dorë, por me një letër gjysmë të “mistershme”, të dërguar tre figurave kryesore të vendit, Braho ia ka dalë edhe një herë tjetër ta ndryshojë fokusin e debatit. Nëse deri dje flitej për korrupsion, sot flitet për komplot, nëse dje flitej për miliona euro e lekë të shkuara atje ku nuk duhej, sot flitet rishtas për përgjime, për kërcënime, për Doshin e për Priftin!
Pikërisht atëherë kur po hapeshin petët e lakrorit të aferave pa fund me kazanin e CEZ-it, ka ndodhur që i vëni me shpatulla pas murit të kthehet në viktimë. Në fakt, qe vetë Meta ai që me një deklaratë një ditë më parë dukej hapur se kërkonte t’i mëshonte një teme tjetër, të ardhmes së pasigurt të koalicionit qeverisës. Paksa me qetësi, e paksa me dashuri, kryeparlamentari sugjeroi për aleanca të tjera në të ardhmen.
Përpjekjet duket se kanë rezultuar të frytshme, pasi prej dje mjetet e informimit kanë gëluar nga lajmet për letrën e Brahos, për krisjen tashmë të dukshme të koalicionit qeverisës, e askund nuk është folur më e nuk pritet të flitet për atë se çfarë ka ndodhur vërtet me CEZ-in.
Degradimi i debatit më serioz të bërë kohët e fundit është sinjali më i keq për njerëzit e këtij vendi. Zëvendësimi i mëtimit për të hetuar një prej aferave më të bujshme korruptive me diskutimet mbi prishjen e aleatëve qeverisës e mbi komplote imagjinare apo jo të tilla, veç e shton gremisjen.
Një veprimtar i njohur i shoqërisë civile lajmëroi dje për një plan për falimentimin ekonomik të Shqipërisë në vitin 2017 sipas skenarit grek, por askush nuk flet për të, askush nuk e merr seriozisht, edhe pse shenjat janë bindshëm në krah të tij.
Në vend të kësaj, është hapur qëllimisht, ligësisht, hullia e re, edhe pse e përsëritur, e debatit shterpë mbi marrëveshje okulte, mbi tentativa për eliminime, mbi gropa të hapura për LSI-në nga aleatë e jo të tillë.
Në ditët e ardhshme mund të ketë zhvillime të tjera, akuza të tjera të rënda, ashtu siç edhe është paralajmëruar, ama me shumë gjasa nuk do ketë më vend për një analizë e hetim të mirëfilltë të aferës me CEZ-in.
Pehlivanët e politikës po ia dalin siç duket ta kalojnë lumin edhe këtë herë, për të na mbytur ne në të. /tesheshi.com/
