Ilir Meta ishte shqetësuar shumë sot. Në mbledhjen e Komitetit Drejtues të LSI-së, kreu i Kuvendit deklaroi se ka një sulm publik ndaj partisë që drejton.
Gjithashtu sot Meta ka zhvilluar një takim me ambasadorin e SHBA-së, Donald Lu.
Rreth këtij takimi, nuk ka pasur një njoftim të detajuar por shpërthimi i Metës, ka në fakt një bazë që i jep arsye irritimit të tij.
Prej zgjedhjeve të 21 qershorit, LSI ka qenë nën goditjen e forte, jo vetëm të një pjese të opinionit publik por edhe të ndërkombëtarëve të cilët me gjuhën diplomatike kanë treguar gishtin ndaj performancës politike të Ilir Metës.
Pasi LSI-ja udhëhoqi fushatën elektorale për të marrë bashkinë e Vorës, ndërkombëtarët kanë nisur mesazhe të qarta që nuk pajtoheshin me konceptin e Metës për të marrë pushtetin nëpërmjet ofensivës së të punësuarve.
Ambasada Amerikane lëshoi më shumë se një deklaratë mbi përdorimin e mësuesve dhe punonjësve të ujësjellësave si një “ushtri politike”.
Kreu i vëzhguesve të misionit të OSBE-ODIHR, Audrey Glover, e cila vizitoi Shqipërinë një muaj më parë, u takua veçmas me drejtues të LSI-së ku përmendi çështjen e Vorës.
Pas këtij takimi, nënkryetari i LSI-së, Petrit Vasili dhe sekretari i përgjithshëm, Luan Rama dolën para gazetarëve dhe deklaruan se “problemet në zgjedhje nuk duhet të futen më në raport”.
Sipas raportit, në zgjedhjet e Vorës është investuar në mjete jashtëelektorale dhe jashtëpolitike për të ndikuar në rezultat.
Dhe siç mësohet, ky raport nuk ka ardhur si “rrufe në qiell të pastër”, por ka pasur si bazë raportimin e gjerë dhe intensiv të diplomatëve të Perëndimit në Tiranë, të cilët kanë qenë mjaft aktivë ditën e zgjedhjeve në bashkinë Vorë, por edhe në Durrës apo dhe Kavajë, ku opozita ka lëshuar alarmin.
Pas aferës së Vorës ndodhi çështja “CEZ” ku sërish Ilir Meta ishte një nga njerëzit e përmendur nga agjencia ballkanike BIRN.
Në mes të kësaj stuhie, Ilir Meta arriti të “rregullojë” një vizitë në Uashington ku premtoi një mesazh të fortë që do ta çante “izolimin” e kësaj partie.
Por pikërisht atëherë kur ai priste të zgjidhte gjithçka, ndodhi intervista me “Zërin e Amerikës”, e cila prishi gjithçka, pasi i kujtoi Metës luksin dhe jetën mondane.
“Ka përpjekje për të dëmtuar imazhin e LSI-së në mënyrë të padrejtë për arsye politike. Përgjigja jonë ndaj gjithë atyre që janë të shqetësuar për rritjen e LSI-së është trasnparencë maksimale dhe në çdo gjë. Goditje pa mëshirë ndaj korrupsionit dhe në radhë të parë kur këto shfaqen tek përfaqësues të LSI-së”, deklaroi Meta sot dhe ka nisur një vrull edhe më të madh për ta shtuar forcën elektorale të partisë së tij. Siç duket të gjithë po përgatiten për zgjedhje…./tesheshi.com/
