Nga Bukurie Kastrati
Megjithëse stina e verës sivjet nuk po ngutet të vijë, sezoni turistik në zonat bregdetare tashmë ka hapur portat për të pritur vizitorë e turistë.
Sipas parashikimeve të operatorëve turistikë edhe ky vit pritet të jetë i mbarë sa i përket numrit të turistëve të huaj që do vizitojnë vendin tonë. Gjithashtu, agjencitë turistike flasin për një nivel të rezervimeve jashtë vendit deri në 30% më të ulët krahasuar me një vit më parë, fenomen ky që përvec të tjerash, lexohet edhe si dobësim i ekonomisë së familjeve shqiptare. Operatorët turistikë thonë se, ashtu siç ndodh rëndom në prag zgjedhjesh, një tjetër arësye që ka ndikuar në uljen e numrit të prenotimeve për pushime të shqiptarëve jashtë vendit , është edhe procesi i zgjedhjeve lokale të 21 qershorit. Ata më besnikët e bregdetit tonë, shqiptarët e Kosovës, pritet të jenë sërish turistët me numrin më të lartë në vendin tonë, të ndjekur nga shqiptarët e Maqedonisë. Nëse deri dy-tre vite më parë, bregdeti i Durrësit ishte plazhi më i preferuar për kategorinë më të mirëpritur të turistëve, shqiptarët përtej kufijve, këta të fundit në mënyrë të theksuar kanë ndryshuar destinacion, duke iu drejtuar vijës bregdetare të veriperëndimit të Shqipërisë, plazhit të Shëngjinit dhe atij të Velipojës. Të kontaktuar nga portali “tesheshi.com”, disa prej operatorëve që ofrojnë shërbimet e tyre në dy këto zona turistike, pohojnë se vitin e kaluar, mbi 60% turistëve (vizitorë me netëqëndrim), vinin nga Kosova dhe Maqedonia, shifër kjo që pritet të rritet këtë vit. Ata thonë se cilësia e rërës me veti të shumta kuruese si dhe niveli i lartë i jodit, i përqendruar kryesishst në vijën bregdetare që përshkon Velipojën, janë bërë tashmë arësyet kryesore që joshin pushuesit, të cilët janë bërë të përvitshëm tashmë. Çmimet, faktor ky me të cilin edhe është abuzuar në të kaluarën, këtë vit duken të më të harmonizuara në raport më atë çka ofron kompleksiteti i shërbimeve. Problemet me ujin e pijshëm janë reduktuar ndjeshëm e po ashtu ato të furnizimit me energji elektrike. Edhe infrastruktura rrugore apo sistemi i ndriçimit në zonat e plazhit ka përmirësim të dukshëm. Bregdetin e Shëngjinit, nga pikëpamja infrastrukturore dhe niveli i cilësisë së shërbimeve publike, pa asnjë mëdyshje mund ta quash modelin më të mirë nga i cili mund të mësohet. Si kudo, hoteleria ofron larmi standardesh shoqëruar me larmi çmimesh. Nuk mungojnë suitat luksove, çmimi i të cilave varion deri në 250 euro nata, por as dhomat e thjeshta të cilat me kushte optimale mund t’i gjesh jo më shumë se 20-25 euro nata/person. Referuar pasqyrave të çmimeve që ofrojnë dhjetra hotele që shtrihen në këtë gjatësi të vijës bregdetare, mesatarisht një dhomë dyshe ofrohet për 40-45 euro/nata dhe ajo teke 25-30 euro/nata. Për jo më shumë se 50 euro nata, gjen hyrje familjare, ambientet e të cilave ofrojnë edhe kushtet për vetëgatim.
Por, për pushuesit me më pak pretendime, akoma më tërheqës në çmime vazhdon të mbetet turizmi familjar, pra ambientet e ofruara në shtëpitë private të banorëve vendas. Kapacitetet e hotelerisë duken të mjaftueshme në raport me pritshmëritë. i ç’niveli do të jetë rendi dhe siguria në këto dy zona tejet të populluara përgjatë tre muajve të kësaj vere, mbetet për tu parë!
/tesheshi.com/
