Harald Krueger, shefi ekzekutiv i BMW-së që nga maji i këtij viti, u shemb sot përdhe ndërsa po u drejtohej mediave në Sallonin Automobilistik në Frankfurt.
Kompania e prodhimit të makinave u detyrua ta ndërpresë konferencën e shtypit, por lajmëroi se nuk kishte arsye për t’u shqetësuar për shëndetin e shefit 49-vjeçar.
Zëdhënësi i kompanisë nuk la vend për alarm, duke e shpjeguar rrëzimin e shefit të BMW-së me emocionin e tepërt dhe tensionin e ulët të gjakut. Por takimet e mëpastajme të Krueger-it u anuluan të tëra.
Kjo ishte paraqitja e parë e Harald Krueger-it si shefi i BMW-së pasi e mori detyrën nga Norbert Reithofer në maj të 2015-ës, por që për fat të keq nuk shkoi ashtu siç duhet.
Salloni Automobilistik i Frankfurtit është një prej aktiviteteve kryesore të paraqitjes së makinave në Gjermani.
Një veprimtari e zhvilluar çdo gjashtë muaj, salloni u hap sot për shtypin, e që nga e shtuna mund të vizitohet prej publikut të gjerë. /tesheshi.com/
