Acarimi i situatës politike në Shqipëri i ka alarmuar ndërkombëtarët që janë investuar në miratimin e reformës në drejtësi.
Ditën e sotme pritet të vijë nga Komisioni i Venecias dokumenti i rekomandimeve për draftin e reformës, që më pas, nga 1 marsi, të nisë shqyrtimi në Kuvend.
Burime diplomatike i thanë faqes elektronike tesheshi.com se SHBA-të dhe BE-ja pritet të ndërmarrin një mision të fundit për të ndarë “shapin nga sheqeri”. Bëhet fjalë për një nismë të një takimi të nivelit të lartë ndërmjet Edi Ramës dhe Lulzim Bashës, për të vendosur nëse do të arrihet një konsensus për të miratuar reformën në drejtësi.
Burimi deklaroi se “rritja e stekës” së Bashës në kërkesat e tij drejtuar mazhorancës po merret si pjesë e
presionit për të arritur një marrëveshje që do t’i japë kreut të PD-së ndjesinë e fitimtarit, ndërkohë që si Berisha ashtu edhe eksponentë të tjerë brenda PD-së po nxisin për të mos e votuar reformën në drejtësi.
Siç mësohet, brenda grupit parlamentar të PD-së është përvijuar një grup deputetësh që janë gati ta votojnë reformën në drejtësi nëse do të kishte vendim politik nga selia blu.
Por acarimi i papritur i ka vështirësuar punët. Vetë organi zyrtar i PD-së, Rilindja Demokratike, shkruante sot me titull të madh, “Sot me vezë, nesër me shkelma”, duke i dhënë komunikimit politik një goditje të rëndë. Megjithatë, kjo ende shihet si një mjet për të arritur synimin e PD-së që të dalë e fituar nga një dialog me mazhorancën.
Varianti tjetër rezervë, për të cilin ka rënë dakord edhe Edi Rama, është që në qershor Shqipëria të shkojë në zgjedhje të parakohshme parlamentare nëse dështon reforma në drejtësi. Por ky variant pritet të vijë pas përpjekjes për një “deal”.
Dita e sotme dhe e nesërmja do të jenë të rëndësishme, pasi priten komentet mbi rekomandimet e Venecias. Nëse këto komente do të jenë pozitive, atëherë mundësia e një takimi do të jetë e afërt. Në atë rast, diplomatët do të negociojnë një projektmarrëveshje, për të cilën do të bihet dakort paraprakisht, për t’u firmosur më pas nga palët. Por a do ta lërë Berisha Bashën ta bëjë këtë?
Burimi diplomatik bëri të ditur se, “Nuk ka shans më për të luajtur shumë. Nëse dështon reforma, politikanët përgjegjës do të izolohen nga Perëndimi. Pikërisht siç ka bërë të ditur edhe ambasadori Lu, por që u tha edhe në mesazhin publik të sekretarit amerikan të Shtetit, John Kerry, gjatë vizitës në Tiranë. /tesheshi.com/
