SHBA-të kanë dënuar të mërkurën përdorimin e armëve kimike nga ana e qeverisë siriane, pasi një hetim i kryer nga OKB dhe Organizata Ndërkombëtare për Ndalimin e Armëve Kimike (ONAK), të cilat kanë konstatuar se këto forca janë përgjegjës për dy sulme me gaz toksik në atë vend.
“Tani është e pamundur të mohohet fakti se regjimi sirian ka përdorur në mënyrë të përsëritur klor industrial si armë kundër popullit të vet”, ka thënë zëdhënësi i Këshillit të Sigurimit Kombëtar, Ned Price.
Price ka thënë se SHBA-të do të punojnë me partnerët e tyre ndërkombëtare që të kërkojnë llogaridhënie nëpërmjet mekanizmave të duhura diplomatike, njofton Reuters.
“I bëjmë thirrje gjitha vendeve anëtare të OKB-së dhe vendeve që janë nënshkruese të Konventës mbi Armët Kimike, përfshirë Rusinë dhe Iranin, që të marrin pjesë në këto përpjekje”, ka thënë Price.
Sot më herët janë publikuar rezultatet e një hetimi të përbashkët të OKB-së dhe ONAK-ut të cilat bëjnë fajtore forcat e qeverisë siriane për dy sulmet me gaz helmues në atë vend.
Hetimet, të cilat kanë zgjatur një vit, kanë zbuluar se ka prova të mjaftueshme për të konkluduar se helikopterët e forcave ajrore të Sirisë kanë gjuajtur predha, nga të cilat më vonë janë liruar substanca toksike në krahinën veri-perëndimore të Idlibit, respektivisht në fshatin Talmenes me 21 prill të vitit 2014 dhe në qytetin Sarmin me 16 mars të vitit 2015.
Në të dyja rastet, është përdorur klor, njofton Reuters, i cili ka pasur qasje në raportin e OKB-së dhe ONAK-ut.
Gjithashtu, është konstatuar se nuk ka të dhëna të mjaftueshme për të konkluduar se pjesëtarët e Shtetit Islamik kanë qenë të vetmit entitet me mundësi, aftësi, motiv dhe mjete për të përdorur mustardë sulfuri me datën 21 gusht të vitit 2015.
Hetimi i OKB-së dhe ONAK-ut, i cili u miratua unanimisht nga Këshilli i Sigurimit të OKB-së, ka përfshirë nëntë sulme në shtatë zona në Siri, ku përmes një hetimi të veçantë ONAK-u ka gjetur se janë përdorur armë kimike. /tesheshi.com/
