Shtetet e Bashkuara kanë ndërprerë ndihmën ushtarake dhe ekonomike për Egjiptin me vlerë gati 100 milionë dollarë, dhe kanë shtyrë dhënien e një shume tjetër prej 200 milionë dollarëve shtesë, derisa Kajro zyrtare të mos tregojë progres në respektimin e lirive civile.
Kajro shprehu keqardhjen lidhur me këto vendime, ku ndërkaq, takimi i këshilltarit të Presidentit amerikan, Jared Kushner me ministrin e Jashtëm egjiptian është shtyrë.
Dje, zyrtari i Departamentit të Shtetit sqaroi vendimin, duke thënë se “Sekretari amerikan i Shtetit Rex Tillerson vendosi se është në interes të Shteteve të Bashkuara të pezullojë ndihmën e planfikuar. Ne mbetemi të shqetësuar, ngase Egjipti nuk ka bërë përparim në fushat kyçe, duke përfshirë të drejtat e njeriut dhe ligjin për OJQ-të.”
Ligji i përmendur, i cili hyri në fuqi në maj, kufizon punën e OJQ-ve në zhvillimin e programeve të shumta sociale në Egjipt. Ai gjithashtu parasheh dënim me burg deri në pesë vjet për shkelje të ligjit.
Aktivistët për të drejtat e njeriut thonë se ligji është pjesë e rritjes së presionit të presidentit Abdel Fattah al-Sisi ndaj kritikëve, që nga koha kur mori pushtetin në vitin 2013.
Ndërkohë, ministri i Jashtëm i Egjiptit, Sameh Soukry ka anuluar një takim në Kajro me Jared Kushner, këshilltarin dhe dhëndrrin e president amerikan Donald Trump, për shkak të vendimit të Uashingtonit që të ndalojë ndihmën miliona dollarëshe, raporton Reuters.
I dërguari i Trump-it, megjithatë do të takohet me presidentin Sisi. Kushner ka disa ditë që ndodhet në një turne në Lindjen e Mesme, me qëllim të përgatitjes së terrenin për zhbllokimin e procesit të paqes. /tesheshi.com/
