Kreu i Republika Srspka në Bosnje, Milorad Dodik, pos vulës “non grata”, edhe u sanksionua së fundi nga Departamenti i Shtetit.
Ndodh kjo teksa tensionet në Bosnje, me protagonist pikërisht këtë njeri, janë shtuar së tepërmi, deri në frikën e një konflikti të ri, pasi llogaritet që Dodik po tenton ndarjen e Bosnjes.
Informacioni është publikuar në faqen e internetit të Departamentit të Tregtisë së SHBA-së.
Në listë, po nga rajoni, është edhe një media serbe, Televizioni Alternativ në Banja Luka.
Qeveria amerikane, më saktë Ministria e saj e Financave, filloi në dhjetor me vendosjen e sanksioneve për njerëzit nga Ballkani Perëndimor.
Sipas tyre, këto veprime janë ndërmarrë në përputhje me Urdhrin Ekzekutiv (E.O.) 13818, i cili bazohet dhe zbaton Ligjin Global për Përgjegjësinë për të Drejtat e Njeriut – Magnitsky, dhe synon ata që janë përgjegjës për korrupsion dhe shkelje të rënda të të drejtave të njeriut.
“Krimi i organizuar ndërkombëtar dhe korrupsioni shpesh shkojnë paralelisht me efekte masive destabilizuese mbi shtetin e së drejtës dhe qeverisjen demokratike,” tha Andrea M. Gacki, ish-kreu i Zyrës së Kontrollit të Pronës së Huaj.
Sanksionet e SHBA bllokojnë kryesisht pronën e individëve në listë dhe qytetarëve amerikanë u ndalohet të bashkëpunojnë me ta.
Po çfarë thuhet konkretisht për politikanin problematik serb?
“Dodik bënë thirrje për marrjen e kompetencave shtetërore dhe krijimin e institucioneve paralele në Bosnje nëpërmjet Republikës Srpska”, thuhet në shpjegim.
“Për më tepër, Dodik përdor pozicionin e tij zyrtar për të grumbulluar pasuri personale përmes ryshfetit dhe formave të tjera të korrupsionit. Retorika e tij etnonacionaliste e ndarjes pasqyron përpjekjet e tij për të çuar përpara këto synime politike dhe për të larguar vëmendjen nga aktivitetet e tij korruptive. Këto veprime kërcënojnë stabilitetin, sovranitetin dhe integritetin territorial të Bosnjes dhe minojnë Marrëveshjen e Paqes të Dejtonit, duke rrezikuar kështu paqëndrueshmëri më të gjerë rajonale”.
Shpjegimi përfshin edhe deklaratën e nënsekretarit të Ministrisë së Financave, Brian E. Nelson.
“Aktivitetet destabilizuese korruptive të Milorad Dodik dhe përpjekjet për të rrezikuar Marrëveshjen e Paqes të Dejtonit, të motivuara nga interesat e tij, kërcënojnë stabilitetin e Bosnjes dhe të gjithë rajonit,” tha Nelson.
Ndërsa për Televizionin Alternativ, auroritetet amerikane shprehen se është në pronësi të një kompanie të lidhur ngushtë me familjen e Dodikut. Por, shtohet, në prapaskenë, vetë Dodik ushtron kontroll personal mbi ATV-në, për shembull, duke miratuar histori mediatike që lidhen me tema të ndjeshme politikisht.
“Dodik ka aktivizuar ATV për të avancuar qëllimisht dhe në mënyrë eksplicite axhendën e tij, e cila përfshin përpjekjet e tij për të nxirë figurat e tjera politike, për të zbutur imazhin e tij publik dhe për të avancuar qëllimet e tij personale dhe politike”.
Ndërkohë, kujtojmë se rasti “Dodik” është përdorur nga kampi politiko-mediatik në mbrojtje të Berishës, si një arsyetim i vijimit të aktivitetit politik të këtij të fundit, me synimin për rimarrjen e PD-së, pse jo, edhe qeverisjes, paçka shpalljes “non grata”. Kjo për faktin se autoritetet amerikane e takojnë Dodikun edhe pse mban vulën e personit “non grata”.
Por ambasadorja Yuri Kim, në një shpjegim të saj, tha se dy rastet nuk mund të krahasohen, pasi Dodik, për vetë pozicionin e tij në Presidencën trepalëshe boshnjake, s’mund të anashkalohet.
Ndërkohë, kjo vendimmmarrje amerikane mund të shërbejë dhe si një paralajmërim për Berishën, i cili vijon të sfidojë SHBA-të në aksionet e tij politike dhe ligjërimin politik. /tesheshi.com/
