Dhoma e Përfaqësuesve me shumicë votash miratoi sanksione shtesë ndaj Rusisë, Iranit dhe Koresë së Veriut, pavarësisht kundërshtimit nga presidenti Trump.
Për futjen e sanksioneve të reja votuan 419 anëtarë, ndërsa tre ishin kundër, raporton Reuters.
Për të hyrë në fuqi, sanksionet duhet të miratohen nga Senati, para sa presidenti ta nënshkruajë ligjin apo të vë veto në të.
Shtëpia e Bardhë ka thënë se Trump nuk ka vendosur ende nëse do të nënshkruajë ligjin.
Moska është nën presion nga Uashingtoni për përfshirje të dyshuar në zgjedhjet presidenciale të SHBA vitin e kaluar dhe për shkak të krizës në Ukrainë, ndërsa Shtetet e Bashkuara akuzojnë Iranin për zhvillimin e programeve të raketave balistike dhe për inkurajimin e tensioneve rajonale.
Koreja e Veriut është ekspozuar një periudhë të gjatë tashmë ndaj presioneve të ndryshme dhe sanksioneve të bashkësisë ndërkombëtare për zhvillimin e raketave balistike dhe zhvillimin e armëve bërthamore. /tesheshi.com/
