Deklarimet e krerëve të institucioneve kosovare se për shfuqizimin e Speciales apo jo vendosin deputetët dhe nëse veç merret një vendim i tillë do e respektojnë, ka bërë që të reagojë sërish Ambasanda e Amerikës në Prishtinë duke thënë se çfarëdo përpjekje e tillë e përsëritur do të kishte pasoja të thella negative për të ardhmen evropiane të Kosovës.
“Gjatë kësaj jave udhëheqësit e Kosovës kanë bërë deklarata të përsëritura publike duke thënë se një iniciativë lidhur me Gjykatën Speciale, e ndërmarrë në Kuvendin e Kosovës, nuk do të dëmtojë marrëdhëniet ndërkombëtare të Kosovës. Ata e kanë gabim. Çfarëdo përpjekje e tillë e përsëritur do të kishte pasoja të thella negative për të ardhmen evropiane të Kosovës dhe për marrëdhënien e saj me Shtetet e Bashkuara”, thuhet në komunikatë.
Ambasada amerikane tërheq vërejtjet se kërcënimet me dhunë janë tërësisht të papranueshme, dhe sipas saj qartësisht dhe pa mëdyshje ato duhet të hidhen poshtë nga qeveria.
“Jemi jashtëzakonisht të dëshpëruar me ata që do të sakrifikonin të ardhmen e shtetit të tyre dhe përkrahjen e patundur të Shteteve të Bashkuara në favor të interesave të tyre personale”, thuhet në komunikatë.
Kujtojmë se javë më parë 43 deputetë kosovarë filluan një iniciativë për shfuqizimin e ligjit për Gjykatën Speciale, e cila u ndal pas ndërhyrjes së ashpër nga ana e SHBA-së dhe shteteve të BE-së. /tesheshi.com/
