Presidenti i Shteteve të Bashkuara, Donald Trump, tha të premten se po rekomandon një tarifë të drejtpërdrejtë prej 50% për mallrat nga Bashkimi Evropian duke filluar nga 1 qershori, raporton Reuters.
Ai deklaroi se ishte e vështirë të bashkëpunohej me Unionin në tregti.
“Bashkimi Evropian, i cili u themelua me qëllimin kryesor për të shfrytëzuar Shtetet e Bashkuara në tregti, ka qenë shumë i vështirë për të bashkëpunuar”, shkroi udhëheqësi amerikan në platformën e tij sociale Truth Social.
“Bisedimet tona me ta nuk po çojnë askund! Barrierat e tyre të forta tregtare, TVSH-ja, dënimet absurde për korporatat, barrierat jo-tarifore, manipulimet monetare, paditë e padrejta dhe të pabazuara kundër kompanive amerikane dhe shumë më tepër, kanë çuar në një deficit tregtar me SHBA-në prej më shumë se 250 miliardë dollarësh në vit, një shifër që është plotësisht e papranueshme”, tha presidenti amerikan.
Reuters raportoi se Komisioni Evropian të premten refuzoi të komentojë mbi rekomandimin e Trump-it për të vendosur një tarifë prej 50 përqind për mallrat nga Bashkimi Evropian nga 1 qershori.
Kur u pyetën nga Reuters, përgjigjja ishte se do të prisnin bisedën telefonike midis komisionerit Evropian të Tregtisë Maroš Shefçoviç dhe homologut të tij amerikan Jamieson Greer, e cila pritet të zhvillohet gjatë ditës.
Gjermania ka kritikuar kërcënimin e Trump për të vendosur tarifa prej 50 për qind për mallrat nga Bashkimi Evropian, duke paralajmëruar se masa të tilla do të dëmtonin si tregjet amerikane ashtu edhe ato evropiane, raporton Anadolu.
Duke folur në një konferencë për shtyp në Berlin, Ministri i Jashtëm gjerman Johann Wadephul tha se organi ekzekutiv i BE-së, Komisioni Evropian, do t’i përgjigjet deklaratës së Trump-it, me mbështetjen e plotë të Gjermanisë.
“Unë besoj se tarifa të tilla nuk i ndihmojnë askujt. Ato do të çonin vetëm në një ngadalësim të zhvillimit ekonomik në të dy tregjet. Kjo është arsyeja pse ne vazhdojmë të këmbëngulim në negociata dhe të mbështesim Komisionin Evropian”, tha Wadephul, duke shtuar se shpresojnë të vazhdojnë dialogun në mënyrë që të bindin partnerët e tyre amerikanë. /tesheshi.com/
