Studiuesi i Qendrës për Sigurinë Energjetike Evropiane me seli në Londër, Dr. Slaëomir Raszevski, thotë se gazsjellësi TAP ka më shumë shanse për t’u ndërtuar në krahasim me “Rrjedhën Turke”(Është një gazsëjellës që do të furnizojë me gazin që vjen nga Rusia).
SHBA – FMN të shpërblejë Greqinë, nëse del nga “Rrjedha Turke”
Gal Luft, këshilltar i lartë i sigurisë energjetike të SHBA-ve, ka theksuar se Uashingtoni pret nga Fondi Monetar Ndërkombëtar (FMN) që ta shpërblejë Greqinë, në rast se ky vend tërhiqet nga “Rrjedha Turke”.
“Në rast se Greqia tërhiqet nga ‘Rrjedha Turke’, një projekt që është në interes të Moskës, SHBA-ja pret nga FMN-ja që ta shpërblejë Greqinë”, – tha Luft.
Sipas tij, SHBA në vend të “Rrjedhës Turke” do t’i përkushtohen përfundimit të ndërtimit të Gazsjellësit Trans-Adriatik (TAP), i cili përmes Greqisë shpërndan gazin nga Azerbajxhani në Evropë.
Dr. Slaëomir Raszewski, studiues në Qendrën për Sigurinë Energjetike të Evropës, me seli në Londër, tha se më shumë është e mundur të ndërtohet gazsjellësi TAP se sa “Rrjedha Turke”. Ai rikujtoi se ndërtimi i projektit energjetik TAP është në vijim. Analisti gjithashtu beson se “Rrjedha Turke”, mbi të gjitha është një projekt politik.
“Ende nuk janë të qarta detajet e ‘Rrjedhës Turke’, që është një projekt politik. Nuk e dimë se çfarë projekti do të jetë. TAP është një projekt më i sigurt nga ‘Rrjedha Turke’. Ky është një projekt, i cili tashmë ka filluar. Nga ana tjetër, marrëdhëniet mes Rusisë dhe Bashkimit Evropian janë duke u përkeqësuar, dhe arsyeja kryesore për mosmarrëveshjet e tyre është tregtia e energjisë”, -tha Raszewski.
Ai vlerësoi se Rusisë në lidhje me gazsjellësin turk i nevojitet një vend në afërsi të Bashkimit Evropian. Sipas mendimit të tij, Moska ushtron presion të fortë dhe të vazhdueshëm mbi vendet e tjera për të realizuar projektin e lartpërmendur. Sipas tij, do të jetë shumë e vështirë për Evropën që të reduktojë varësinë e saj ndaj gazit rus.
Ndërtimin e mundshëm të “Rrjedhës Turke”, Presidenti rus Vladimir Putin e paralajmëroi në mes të shkurtit gjatë një vizite të kryeministrit hungarez Orban.
“Turqia, Greqia, Maqedonia, Serbia dhe Hungaria do të formojnë grupin e ekspertëve nga sektori i energjisë, për të bërë studimin e fizibilitetit për realizimin e tubacionit të “Rrjedhës Turke”, kështu u vendos pas mbledhjes së parë të ministrave të Jashtëm të pesë vendeve në Budapest në prill të këtij viti.
Ndërkohë, me rekomandimin e Komisionit Evropian, Bullgaria dhe Serbia në fund të vitit të kaluar kanë ndalur punimet në tubacion tjetër rus – “Rrjedha e Jugut”.
Është vlerësuar se kapaciteti i “Rrjedhës Turke” duhet të jetë i ngjashëm me atë të “Rrjedhës së Jugut” – 63 miliardë metra kub gaz në vit.
Sipas projektit të planifikuar, “Rrjedha Turke” do të fillojë në Rusi, përmes Detit të Zi do të kalojë në pjesën evropiane të Turqisë, duke vazhduar përmes Greqisë, Maqedonisë dhe Serbisë në Hungari, nga ku do të degëzohej në vendet tjera evropiane.
