Roberto Mançini është i vendosur në ide të e tij. Për të ardhmen e Interit ai parashikon një repart sulmues të formuar nga Ikardi dhe dy mesfushorë sulmues. Për momentin, siguria e vetme e 50-vjeçarit qëndron te sulmuesi argjentinas, pasi lojtarët e krahut ende s’kanë mbërritur.
I bindur
Xherdan Shaqiri është më shumë se kurrë i bindur në aftësitë e veta dhe mundësitë e Interit për t’u kthyer ekipi, i cili, deri pak vite më parë, dominonte Europën. Këto janë dy shkaqet kryesore që e kanë shtyrë 23-vjeçarin nga Kosova të kthejë mbrapsht ofertën e Stok Sitit dhe atë të Atletikos së Madridit. Ekipi anglez kishte ecur aq shumë me tratativat sa gjeti akordin me Interin. Skuadra milaneze ishte gati ta shiste Shaqirin për 17 milionë euro. Ndërsa nga ana e Atletikos, interesi ishte më i vakët. Por, për këtë çështje, Interit do t’i duhet të bindë së pari vetë lojtarin. Ky i fundit u largua nga Bajerni i Mynihut pak muaj më parë dhe nuk ka ndër mend të largohet nga “San Siro” pas 6 muajsh eksperiencë.
“Mall” shkëmbimi
Kosovari nga Gjilani e ka parë veten në mes të disa tratativave, prej të cilave “fiton” vetëm Interi. Ky i fundit, duke qenë se është në vështirësi ekonomike, dëshiron të “përdorë” famën e trekuartistit për të ulur kostot e lojtarëve që pretendon të marrë në merkato. Jo më kot Shaqiri i është ofruar Atletikos së Madridit për të marrë në këmbim Mario Suarezin. E njëjta gjë vlen edhe me tentativën që ka bërë Interi në orët e fundit me Volfsburgun. Milanezëve u interesojnë shërbimet e Perisiç. Sipas “La Gazzetta dello Sport”, në këmbim të mëngjarashit kroat, Interi ofron Xherdan Shaqirin. Rreth këtij lajmi ka investiguar më shumë edhe “Blick”. Në versionin online të së përditshmes zvicerane thuhet se klubi i Volfsburgut nuk është i interesuar të shtojë radhët e helvetëve në ekip (deri më tani ata kanë Benaglion, Rodriguezin dhe Klozen). /tesheshi.com/
