Përfaqësuesja e futbollit e Kosovës ka zgjedhur fushën e Laçit për të zhvilluar një seancë stërvitore në prag të ndeshjes me Islandën për eliminatoret e Botërorit “Rusia 2018”.
Pas stërvitjes, Fadil Vokri, presidenti i federatës kosovare është shprehur: “Ekipi duket se është në formë të mirë dhe jemi optimist për këtë sfidë e cila na përballë me një ekip mjaft të fortë”.
Ndërsa dhe trajneri Albert Bonjaku tha: “Gjatë stërvitjeve djemtë po tregohen mjaft aktivë dhe duket se kanë tërë përgatitjet e nevojshme. Perceptimi se përballemi me ekip të fortë, nuk është se i trembemi atyre, pasi jemi në pritje të dy lojtarëve që luajnë në disa skuadra të huaja. Kjo na inkurajon dhe më shumë nga fakti se mosha mesatare e ekipit është 22-vjeçare, një tregues i qartë i perspektive”.
Më tej, ishte Benart Berisha, ish-futbollisti i Skënderbeut, i cili ka premtuar lojë efektive, sigurisht dhe rezultative përballë islandezëve. “Personalisht ndjehem në formë të mirë sikurse i tërë ekipi kosovar. Forma e mirë e futbollistëve dhe mbështetja e publikut është një mundësi më shumë për të arritur rezultatin e duhur në sfidën e vështirë ndaj Islandës”.
Pas stërvitjes në Laç, kombëtarja e Kosovës është nisur drejt Shkodrës. /tesheshi.com/
