Ndërsa afrohet sezoni i ri i mbjelljeve, duket se qeveria ka vendosur të ndërhyjë në parandalimin e kultivimit të kanabisit, për të mos lejuar situatën e vitit të shkuar. Kështu, qeveria ka hartuar një plan për parandalimin dhe kultivimin e lëndëve narkotike që u paraqit në një dalje të posaçme për mediat nga zëvendëskryeministri Niko Peleshi.
Sipas tij, ky plan parashikon një operacion të gjerë ndër-institucional që do të sigurojë identifikimin e hershëm dhe goditjen që në gjenezë të përpjekjeve për kultivim apo trafikim.
Peleshi nënvizoi se në këtë operacion të kombinuar do të angazhohen institucione, si policia, ushtria, shërbimet inteligjente, bujqësia, mjedisi dhe shumë institucione të tjera.
Numri dy i qeverisë tha se plani parashikon gjithashtu edhe masa për ata zyrtarë që nuk administrojnë dot territorin që janë përgjegjës.
“Në plan, tha Peleshi, parashikohet edhe ndërgjegjësimi qytetar, ndërsa në zonat e prekura nga ky fenomen do të ketë nxitje të ekonomisë së ligjshme dhe lehtësim në taksa”. /tesheshi.com/
