Në futboll kemi parë shpesh përballje, të cilat për rivalitetin e tyre, sportiv ose jo kanë hyrë në histori si sfidat më të nxehta të futbollit mes dy vendeve, por së fundmi listës së ndeshjeve më të nxehta mes përfaqësueseve i është shtuar dhe ajo mes Shqipërisë dhe Serbisë. Britanikja “The Telegraph” ka publikuar së fundmi një renditje me 20 ndeshjet më rivalizuese në rang kombëtaresh gjatë gjithë historisë, dhe Shqipëri-Serbi është përfshirë në këtë klasifikim të sajin duke u renditur në vendin e 13-të. Sipas “The Telegraph”, ndeshja e tetorit të vitit 2014 është padyshim një prej sfidave më të dhunshme në futboll.
“The Telegraph” shkruan, se dy vendet nuk kanë një marrdhënie të mirë me njëra-tjetrën për shkak të Kosovës dhe pritej që në përballjen mes tyre të kishte tension, por Uefa gjithsesi i shortoi bashkë duke qenë se dy vendet nuk kishin qenë asnjëherë zyrtarisht në luftë me njëra-tjetrën. “The Telegraph” shkruan se në atë përballje, lojtarët shqiptarë rrezikuan jo pak në fushën e lojës duke u goditur me sende të forta, nga tifozët që pushtuan fushën ndërkohë që takimi nuk përfundoi kurrë dhe dy kombëtaret vazhdojnë të enden dyerve të gjykatave duke kërkuar drejtësinë që i është mohuar. /tesheshi.com/
