Marrëveshja për targat nuk u arrit të enjten, tha i dërguari i posaçëm i BE-së për dialogun Serbi-Kosovë, Miroslav Lajçak.
“Sot nuk është arritur një marrëveshje për targa. I bëj thirrje negociatorëve kryesorë që të takohen sërish në ditët në vijim për të rënë dakord për hapat e mëtejshëm dhe për të vazhduar bisedimet për çështjet aktuale. Ne presim që të gjithë aktorët të përmbahen nga veprimet që mund të rrezikojnë sigurinë në terren”, shkroi Lajçak në Twitter.
Drejtori i ashtuquajturës Zyrë për Kosovë dhe Metohi dhe kryenegociatori i Serbisë, Petar Petkoviç, pas bisedimeve në Bruksel tha se marrëveshja në tavolina nga 30 shtatori për regjimin e afisheve do të jetë ende në fuqi.
“Kjo do të thotë se derisa të gjendet një zgjidhje e qëndrueshme në një nivel të lartë, regjimi i afisheve do të vazhdojë,” u tha ai gazetarëve.
“Dëshiroj t’u përcjell të gjithë qytetarëve të Serbisë dhe serbëve në Kosovë e Metohi para festave të Pashkëve që të gjithë të jenë të qetë dhe të mos shqetësohen askush”, tha Petkoviç.
Bislimi: Shkak për dështimin, Serbia!
Kryenegociatori i Kosovës, Besnik Bislimi, fajësoi palën serbe për dështimin.
Pas takimit në Bruksel, ai deklaroi se Serbia nuk ka treguar gatishmëri për të arritur marrëveshje dhe për të gjetur zgjidhje.
Ai shtoi se Kosova nuk do të ndërmarrë veprime urgjente dhe se do të vendoset në nivel politik se si do të veprohet me aautomjetet nga Serbia. /tesheshi.com/
